WILLEMSTAD — E torneo di basketbòl hubenil femenino Saliña Galleries March Mania ta kla pa hunga su weganan final. Riba djabièrnè, den su kategoria prinsipal, esta Super League (U18), fanátikonan sintá riba punta di nan stul a mira Platinum bin djatras i pasa nèt riba e kinteto Gold ku skor 46-40.
Anto djadumingu mainta tabatin mas drama ora ku den e kategoria Junior Varsity (U14), den e último 3 sekònde di wega, Spartans a kòrta Panthers su kaminda pa yega final.
Super league
Platinum a sigurá su pase pa final kargá pa Shenaya Drommond i Ace Martis, ámbos ku 15 punto. Den parti defensivo e mes duo ei tabata e reinanan di rebound i steals. Di parti di e ekipo Gold Shanay Obispa tabata bon pa 13 punto den kousa pèrdí.
Den e wega final riba djabièrnè 27 di mart pa 8:30 bou di dak di Sala Errol Rooi na SDK, Platinum lo topa e sinku-nan di Diamond, kabesá pa Cati Lichtenberg.
Fiesta final
Den e kategoria Varsity (U18 menor) Challengers lo topa Spartans den final riba djasabra 28 di mart, tambe na SDK pa 19:30. Djadumingu 29 di mart mainta 11or lo tin e final kategoria Junior Varsity (U14) entre e damitanan di Spartans i Challengers.
Riba e mes djadumingu, algu mas trempan mainta, esta pa 9:30 lo tin e final den kategoria Juniors (U12) entre Pink Panthers i Spartans òf Challengers. E dosnan ei lo hunga nan wega semi final riba djasabra 28 di mart, tra’i mèrdia na Sala Niels Liberia Suffisant.
Women’s Basketball Association of Curaçao ta invitá tur amante di deporte hubenil mucha muhé pa presensia e ronda final di Saliña Galleries March Mania Girls Basketball.