WILLEMSTAD — Den e periodo di preparashon pa nos selekshon di Blue Wave partisipá na World Cup 2026, ta trahando riba un kalènder komun di aktividatnan pa duna sentro di Willemstad un ambiente mas bibu i animá den e periodo di preparashon i durante e evento deportivo internashonal aki. Empresarionan den sentro di siudat ta wòrdu invitá pa inskribí nan aktividatnan via un formulario speshal online.
Partisipashon di Blue Wave na World Cup 2026 lo por atraé miles di bishitante i deportista na Kòrsou. Esaki ta ofresé un oportunidat úniko pa posishoná nos sentro di siudat komo e lugá prinsipal pa eksperensia, entretenimentu, kultura i hospitalidat. Dor di reuní tur e aktividatnan den un solo kalènder sentral, ta deseá na oumentá e visibilidat i huntu garantisá un sentro bibu i atraktivo.
Empresarionan por pensa riba akshonnan speshal, músika bibu, anochinan temátiko, eventonan relashoná ku deporte, presentashonnan kultural, spesialidatnan kulinario òf otro inisiativanan kreativo ku ta konektá ku e ambiente di partisipashon di Blue Wave na World Cup.
Pa medio di registrashon via e formulario speshal di inskripshon, aktividatnan lo wòrdu inkluí den e kalènder ofisial di sentro di siudat rondó di Blue Wave World Cup 2026 i lo forma parti di e kampaña di promoshon komun.
“Esaki ta e momentu pa mustra huntu e forsa di nos sentro di siudat. Dor di reuní aktividatnan i promové huntu, nos ta fortalesé otro i krea un eksperensia inolvidabel pa bishitantenan i habitantenan,” asina sr. Hans van Aalst, Kwartiermaker di sentro di siudat Willemstad, a bisa.
Empresarionan por yena e formulario di inskripshon via: http://bit.ly/3MmbdfG