SAN FRANCISO (DA) — New England Patriots (17-3) i Seattle Seahawks (16-3) lo topa den Super Bowl LX riba djadumingu, 8 di februari pa 7:30 p.m. ora di Kòrsou, riba plataformanan di NBC. E wega ta tuma lugá na Levi’s Stadium na Santa Clara, California.
Esaki ta un wega speshal pasobra tur dos tim tabata hopi fuerte den tantu ofensa komo defensa durante e temporada regular. Esaki ta e promé Super Bowl despues di e union na aña 1970 ku tur dos tim tabata den top 4 di tantu “scoring offense” komo den “scoring defense.”
New England Patriots
New England ta bai hunga nan di 12 Super Bowl — esaki ta e frankisia ku mas aparishon den Super Bowl. Nan por bira e promé tim ku ta gana 7 Super Bowl.
E partisipashon di Patriots den e final ta pekuliar pasobra nan a bini for di un aña malu. Na 2024 nan a kaba temporada ku un rekert di 4-13, i awor e temporada aki nan a yega te Super Bowl.
Patriots a gana e AFC Championship den un wega hopi perta: 10-7 riba Denver.
Seattle Seahawks
Seattle ta bai hunga nan di kuater Super Bowl. Nan ta bai buska nan di dos kampeonato den historia di frankisia. Nan a gana un biaha promé, ora ku nan a gana Denver Broncos den Super Bowl XLVIII ku skor grandi di 43-8.
Seahawks a yega aki despues di gana e NFC Championship 31-27 kontra Los Angeles Rams.
Patriots–Seahawks un biaha mas
Esaki no ta e promé biaha ku e dos tim topa den Super Bowl. Nan a hunga kontra otro den Super Bowl XLIX, kaminda Patriots a gana ku e skor perta di 28-24.
E entrenadornan: dos Mike, dos historia nobo
Patriots ta bou di Mike Vrabel, den su promé temporada ku e tim. Seahawks ta dirigi pa Mike Macdonald, kende a wordu kontratá na 2024.
E quarterbacknan: Maye kontra Darnold
Pa Patriots, e homber prinsipal ta Drake Maye. Durante temporada regular tras di lomba e la kompleta un total di 4,394 yarda, ku 31 touchdown i 8 intersepshon. E tin 23 aña, i e por bira un di e hungadonan mas hóben ku ta gana un Super Bowl komo quarterback titular.
Pa Seahawks, e quarterback ta Sam Darnold. E a la kompleta 4,048 yarda, ku 25 touchdown i 14 interspeshon, i e tabata tin un gran wega den e final di NFC.
Hungadonan pa wak: Smith-Njigba, Lawrence i Williams
Pa Seattle, Jaxon Smith-Njigba a lidera NFL ku 1,793 yarda di resepshon den temporada regular, i den playoffs e la yega 1,965 yarda.
Den defensa, DeMarcus Lawrence tin un sack i un forced fumble den tur dos viktoria di Seahawks den e postemporada.
Pa Patriots, Milton Williams — kende a gana Super Bowl LIX e aña tras di lomba ku Philadelphia — por gana otro biaha, i por hasi esaki den dos aña konsekutivo i ku dos tim diferente.
Loke por disidí e wega
Tur dos tim ta bon den anotá i ta bon den para nan oponente. Esei ta hasi e probabilidad grandi ku e wega ta keda disidi dor di detaye: un eror, un fumble, òf un hungada grandi por kambia tur kos.
E refri principal pa e partido lo ta Shawn Smith.