WILLEMSTAD — Miéntras tumba tabata zona mas pariba, riba djabièrnè último, den e kategoria Super League (U18), e ekipo Gold a bin djatras pa skirbi e promé ‘rally’ dje kampionato 2026 di basketbòl hubenil femenino tras di su nòmber. Despues di un dia desastroso e wikènt promé, e ekipo Gold a gana e partidonan k’e mester a gana, pa koroná su mes ‘reina’ dje promé ‘rally’. Ku e konsepto di ‘rally’, ekiponan ta hunga mas ku un partido di 15-minüt riba un dia.
New ball game
E ekipo Gold a start e djabièrnè pèrde pa 1 punto kontra Diamond. Pero por a nota ku e ekipo Gold a bin kompletamente diferente. A resultá asina mes pasó despues, den partidonan emoshonante, Gold a konopá viktoria na viktoria pa pone e promé ‘rally’ dje kampionato 2026 tras di su nòmber.
Angelina Martis (17) di Gold a hasi su mes e hungadó mas balioso dje ‘rally’ pa su defensa eksepshonal i atake desidido. Otro nan ku a resaltá riba e dia final ta Charité Martis (17) di Platinum i Caitlin Lichtenberg (15) di Diamond ku respektivamente 11 i 21 punto. Máksimo anotadó di Gold p’e anochi tabata Tsutae Martis Guillermo (14) ku 9 punto.
Ganadó dje kategoria Junior (U12), Junior Varsity (U14) i Varsity (U16/18) tabata Pink Panthers, Spartans i Challengers respektivamente. Den Mini tur ekipo a haña medaya di enkurashamentu.
Inovashon
E konsepto di ‘rally’ a resultá eksitoso pasó e ta pas ku e mundu di gratifikashon mesora ku nos tur ta bibando aden. Un ‘rally’ ta un periodo kòrtiku, di wega kòrtiku ku resultado i premio mesora. Pesei por a mira ku e damitanan tabata dediká for di e promé momento.
Kontinuashon
Despues di un pousa pa karnaval lo start ku e segundo parti dje kampionato 2026 5X5. Den henter mart lo hunga e ‘Marcha Madness’ modelá segun basketbòl estudiantil amerikano. Asina ta traha pa e hungadónan siña mantené konsentrashon i dedikashon pa un tempu mas largu. Despues den yüni lo start ku e último parti dje kampionato segun un skema di partidonan kompleto durante dos luna.