WILLEMSTAD — Kòrsou ta orguyoso di anunsiá ku e lo ta anfitrion di e di 24 Asamblea General di Caribbean Association of National Olympic Committees (CANOC) den luna di òktober 2026. Durante e periodo di dia 15 te ku 20 di òktober, Kòrsou lo duna bon bini na representantenan di mas ku 30 pais, kende lo bin eksperensiá e spiritu, kultura i hospitalidat di nos isla.
Den kuadro di e preparashonnan pa ku e evento importante aki, señor Keith Joseph, Presidente di CANOC, lo bishitá Kòrsou huntu ku su ekipo ehekutivo for di dia 30 di yanüari te ku 2 di febrüari 2026. Durante e bishita aki, CANOC lo tene su retiro anual, kaminda lo tuma lugá reunionnan pa traha riba e aspektonan logístiko i koordinashon general pa ku e asamblea. E bishita aki ta marka un paso importante pa asina por garantisá un Asamblea eksitoso i di gran impakto.
E evento ta wòrdu organisá den kolaborashon estrecho ku FDOK, Komité Olímpiko Nashonal di Kòrsou. E meta di e kolaborashon aki ta pa forma lasonan fuerte ku e organisashonnan deportivo den region. Lo tin diferente invitadonan di organisashonnan regional grandi pa ku e evento.
Aparte di e Asamblea General, lo organisá tambe un tayer di CANOC durante di e siman, asina aportando na e balor adishonal na e programa a traves di interkambio di konosementu, diskushonnan stratégiko i oportunidatnan pa fortalesé kapasitashon di e Komiténan Olímpiko Nashonal partisipante.
Ta e Pais anfitrion di e di 24 Asamblea General di CANOC ta representá un paso grandi pa Kòrsou den su kaminda pa logra rekonosementu di parte di e Komité Olímpiko Internashonal (IOC) i membresia den Panam Sports. E evento aki lo pone Kòrsou mas firme riba e mapa deportivo regional i internashonal, dunando visibilidat global i asina tambe reafirmá su ròl komo un partner serio i kapas den e Movementu Olímpiko.
Ku diskushonnan signifikante, kolaborashonnan regional i un eksperensia outéntiko di Kòrsou, e di 24 Asamblea General di CANOC ta primintí di bira un evento memorabel i di gran impakto pa tur partisipante.