WILLEMSTAD — Federashon Biyar Kòrsou ta trahando duru pa sigui promoshoná e deporte di biar. Despues di un tremendo Schotborgh Cup nan a sigui ku otro tremendo evento. Pa promé biaha ta tumando lugá aki na Kòrsou un torneo di biar ku ta enserá 5 diferente disiplina.
Federashon Biyar Kòrsou ta sumamente kontentu ku partisipashon di tur e 25 biardistanan ku a inskribí i ta partisipando. ‘Sharky’s Curaçao Classic’ a inisiá djaluna último ku Bola 10 ku a terminá djaweps i na mes momentu a inisiá ku Bankpool.
Djaluna 26 ta kontinuá ku Bola 8 i djaweps ta terminá e promé fase ku Rotation konosí akinan bou di 61. E biardistanan ku terminá den e promé ocho puestonan lo sigui pa e di dos fase, kaminda lo hunga e disiplina di One Pocket. Un di e weganan mas popular den e deporte di pool.
Shamir Tremus ta gana ‘Bola 10’ i Bankpool
Pa lokual ta trata bola 10, tabata un final hopi pèrtá ku a bai entre Barat Ibrahim i Shamir Tremus. Finalmente Shamir ta titulá kampion ku skor di 6 pa 4. Seguidamente, riba djaweps 22 di yanüari a duna inisio na e di dos evento di Sharky’s Curaçao Classic, ku ta Bankpool i esaki a kulminá djasabra.
Den e disiplina aki tambe Shamir Tremus tabata invensibel. Despues di e dos disiplinanan e finalistanan ta empatá na puesto 5: Michael Arvelo i Afmad Ibrahim , puesto 4: David Prins , puesto 3: Barat Ibrahim , puesto 2 Richinello Francisca i puesto 1: Shamir Tremus.
Awe djaluna ta marka inisio di e di tres disiplina kual ta bola 8 . Federashon Biyar Korsou ta rekordá tur miembro ku awe no tin ‘Shoot Out’. Un danki ta bai na tur biardista partisipante ku a kumpli kabalmente ku e reglanan di partisipashon.
Un invitashon ta bai na tur amante di biar pa bin presensia i disfrutá di e tremendo evento: Sharky’s Curaçao Classic ku ta kontinuá djaluna 26 den Pool Arena na Gosieweg. Federashon Biyar Kòrsou ta sigui traha duru riba un mihó futuro pa e deporte di biar.