WILLEMSTAD — Djabièrnè último, dilanti un públiko animá, Kòrsou su kampionato hubenil femenino di basketbòl 5X5 a kuminsá. Den e struktura nobo, den e promé parti di kampionato lo hunga algun wikènt di ‘rally’. E konsepto di ‘rally’ ta ekisigí ekstra konsentrashon i físika di kada hungadó paso e ta enseñá hunga diferente wega di 15 minúit riba 1 solo dia.
Rally
Djabièrne anochi di 8’or pa 10’or e ekiponan di Super League (U18) a topa otro. Mesora bo por a mira e ‘rally’ su reto pa e talentonan aki. Bo ekipo no por kai atras, pasó no tin tempu pa rekuperá. Obviamente e ekipo Gold a bira víktima dje detay ei. Físikamente tambe por a mira un esfuerso dje damitanan pasó nan tabata sa ku mester bai ful-tròt foi dje promé pitason di kada wega. Mester admití si ku probablemente e orario di wega ta un aspekto èkstra pa kustumá kun’e.
E ‘rally’ a kontinuá sobrá dje wikènt ku weganan den e kategoria Mini, Junior, Junior Varsity i Varsity.
| Sifras prinsipal despues di promé ronda | |||||
|---|---|---|---|---|---|
| Super League (U18 superior) | |||||
| Ekipo | Gana | Pèrde | Tabla | Pts | Saldo |
| 1.Platinum | 3 | 1 | 0 | 6 | +16 |
| 2.Diamond | 3 | 1 | 0 | 6 | +3 |
| 3.Gold | 0 | 0 | 0 | 0 | -19 |
| Varsity (U18) | |||||
| 1.Challengers | 4 | 0 | 0 | 8 | +19 |
| 2.Spartans | 2 | 2 | 0 | 4 | -8 |
| 3.Panthers | 0 | 4 | 0 | 0 | -13 |
Den e kategorianan mas hóben tambe e ekipo Challengers a dominá kompletamente.
Pa loke ta trata sifranan personal den e kategoria ofensivo: den Super League a destacá Caitlin Lichtenberg (Diamond) 31pt, Shenaya Drummond (Platinum) 20pt i Deli Felipa Brooks (Gold) 16pt.
E siguiente diana di ‘rally’ lo ta próximo wikènt foi djabièrne 30 di yanüari.