WILLEMSTAD — Federashon Biyar Kòrsou ta sumamente kontentu di por habri aña ku e gran evento Schotborgh Cup ku e aña aki ta dediká na señora Meredith Trinidat. E selekshonnan di tantu Boneiru i Kòrsou ta den gran forma pa mira ta kua di nan lo kibra e empate di 5 ganá pa banda.
Sra Meredith Trinidat, na kende e di 11 edishon di Schotborgh Cup ta dediká, ta e promé biardista ku a gana medaya den kampionato panamerikano na 2007 na Guatemala. Tambe nos lo duna rekonosementu na Sr. Bryan Farah, pa su kolaborashon i aporte balioso di mas ku trinta aña na deporte di biar.
Poolarena situá riba Gosieweg (sede di Febiko), lo ta esenario prinsipal pa e gran evento di biar ku ta inisiá awe djabièrnè 9 di yanüari pa 7’or di anochi ku e parti ofishal, pa seguidamente start ku e kompetensia nan ku lo kulminá riba djadumingu 11 di yanüari.
Riba djasabra 10 i djadumingu 11 di yanüari e evento ta programá pa start 2’or di mèrdia ku e respektivo enkuentronan.
Boneiru su ekipo ta formá pa e hungadónan di biar Janiro Chatlein, kende ta kapitan di ekipo, Marvin Abdul, Yamir Jimenez, Garino Molina i Steve Simmons. Kòrsou su ekipo ta formá pa su kapitan Raymond Magdalena, Barath Ibrahim, Richinello Fransisca, David Prins, Salim Kuzi i Gemajel Rol.
Michael Arvelo lo fungi komo direktor deportivo i árbitro prinsipal pa e di 11 edishon Schotborgh Cup. Un rekordatorio ta bai na tur miembro i interesado, ku durante di e evento aki lo no tin oportunidat pa bin trein. Tur atenshon ta dediká na Schotborgh Cup.
Pues un invitashon ta bai na un i tur pa bin disfrutá di bon partidonan di pool i duna bo sosten na e deporte di mesa bèrdè i alabes apoyá e kompetidónan.