PUERTO RICO — Djasabra 20 desember nos Liana Pieter di 14 aña a gana Medaya di Oro, i e título haltu di Woman International Master, birando Kampion U16 di Central American and Caribbean Chess Tournament 2025 na Puerto Rico.
Nos Kaylani Jeandor a gana Medaya di Bròns den su kategoria Women U14.
Den kategoria Open U16 nos Amir Ayubi a gana Medaya di Oro, mientras nos Vaibhav Bedi a gana Medaya di Plata den Skak Rapido.
Despues ku Kòrsou su talentonan feminino a gana Medaya di Bròns na Olympiada na Budapest na 2024, i 3 di nan a gana título di Woman Candidate Master, Liana Pieter a kombertí su mes den e promé Ahedresista di Kòrsou ku ta gana e título di Woman International Master!
Den e Strategic Plan di FDOK, Liana Pieter i Vaibhav Bedi ta menshoná komo prospektonan nashonal den Ahedres.
Kapitan Rio Da Silva De Goes, Trainer Fabio Mensing i Federashon di Ahedres Korsou “Fedako” ta hopi orguyoso di e ekipo kompletu ku a representa Kòrsou na Puerto Rico.