WILLEMSTAD – Den e wikènt di 13 i 14 di desèmber un selekshon U18 di Woman’s Basketball Association of Curaçao (WBAC), ku sosten di CG United lo partisipá na e torneo HerWay na Sint Maarten, parti Hulandes. E konsepto HerWay ta e vehíkulo internashonal di FIBA pa promové basketbòl 3X3 bou di mucha muhé i dama. Despues di a risibí islanan ariba na Kòrsou durante e torneo CuraHoops den novèmber, awor WBAC su U18 II lo buska éksito aya na St. Maarten.
Torneo
Rònt Karibe ta invertiendo den basketbòl hubenil femenino 3X3, mirando ku esaki ta un disiplina olímpiko. Ku sosten di CG United WBAC a skohe pa partisipá na e torneo ku su di dos ekipo U-18. Asina ta amplia e eksperensia regional/internashonal bou dje hungadónan lokal.
Yeroen de Aldrey ta dirigí e ekipo formá pa: Isa Francisca (16), Jasmine Kaddoura Chemsedinne (16 – kapitan), Seychelle Libier (16) i Xzasha Pieters (15). E mes ekipo akí a sali na di tres lugá den FDDK su torneo CuraHoops na novèmber último.
Detaye
E ekipo lo a biaha ayera tardi i lo regresá riba djaluna. E weganan lo tuma lugá den LB Scott Auditorium i lo keda di ‘stream’ riba e plataforma di Youtube di SXM Sports (https://tinyurl.com/HerwaySXM).
Pa djasabra 13 di desèmber e skema di wega ta: 15.20 kontra Saba 2, 16.30 kontra St. Eustatius, 18.10 kontra Saba 1 i 19.40 kontra St. Maarten. Ora di wega riba djadumingu lo dependé dje tabla di posishon.