CHILE – Despues di un biahe ku hopi kontratempu, e tim di circuit racing di outo ‘Remote control (R/C)’ di Kòrsou, formá pa koredonan Jacques Pieternella, Rumes Aniceta, Giordano Pieternella i Mekaniko/Team-Manager Alejandro Garcia Loick. Koredonan a yega Chile un dia promé ku kuminsamentu di e Mundial di outo di ‘Remote Control’ organisá pa IFMAR – International Federation of Model Automobile Racing ku ta e organisashon mundial ku ta manehá karedanan internashonal di outonan di ‘remote control’.
Despues di dianan di entrenamentu, a sigui seshonan di kualifikashon. No opstante di fayonan tékniko, tur tres koredó a logra marka tempu kompetitivo. Na seremonia di apertura Kòrsou a briya ku su üniform i pa promé bes dos outo di Kòrsou a keda selektá den ‘Concourse d’Elegance’.
Durante e rondanan di kualifikashon, tanto Rumes Aniceta komo Giordano Pieternella a logra avansá te na kuart final, esaki ta un primisia pa Kòrsou den kategoria 1/8 Scale Nitro Onroad LMP. Den kuart final, fayonan tékniko a stroba ambos koredó pa progresa pa e semifinal.
Den kategoria 40+ (Masters), tur tres koredó tabata presente. Rumes Aniceta i Jacques Pieternella a kore te na halve finale, sinembargo desperfektonan ku clutch i gearbox a forsa nan retirá. Giordano a kualifiká direktamente pa final 40+.
Durante e final grandi 40+, kuminsando for di posishon 10, Giordano a logra subi te na segundo (2) luga. Den un intento pa tuma liderato, un fayo, stimulá pa bientu friu, fuerte i aire seku, kortando riba e driverstand, a pone ku el a terminá na e terser (3) lugá, markando e primisia di Kòrsou riba puesto internashonal den un Kampionato Mundial di R/C.
E tim ta ekspresa un gratitut imenso na tur sponsor i sostenedó: Napa Auto Parts, Garage Baloche, Fundashon Pa Nan, RFR Transport Services, Serpent America, i tur ku a yuda na un manera òf otro. Kòrsou a pone otro página den historia, hibando ku orguyo e ‘Blue Wave’ na nivel mundial.