LIMA – Kompetensia di landamentu di Juegos Bolivarianos a kontinuá kaminda ku nos landadónan di 15 aña ta kompetiendo kontra di e trabukonan di Suramérika pa kue eksperensia i asina tambe prepará nan mes pa e weganan hubenil Sur Amerikano ku lo tuma lugá otro aña na Panamá.
E 2 landadónan hoben aki Lia Pollit i Gabrielle Johannes Maduro ta prospektonan pa medaya den futuro serkano. Mester apuntá ku e kompetidor ku e edat di mas serka di nan tin 19 aña di edat. E dos hobensitanan di Kòrsou ta kompetiendo den kategoria femenino i nan no tin 18 aña ainda. P’esei e resultadonan no ta alarmante ni preokupante paso nan ta trahando riba nan futuro briante.
Pa loke ta e resultadonan landamentu ta lo siguiente:
Dama 100 meter estilo liber: Tabatin 11 partisipante i Lia Pollit a kaba na di 10 lugá ku un tempu di 1.02.13 i Gabrielle Johannes Maduro a keda na di 11 lugá ku un tempu di 1.02.54.
Damas 50 meter estilo lomba: E disiplina aki a konta ku 13 partisipante i Lia a keda na di 11 lugá ku un tempu di 32.05 sekonde, miéntras ku Gaby a terminá na di 13 lugá ku un tempu di 32.85.
Damas 100 meter lomba: Tabatin 11 partisipante i Lia Pollit ta keda na di 8 lugá i asina klasifiká pa final ku su tempu di 1.08.97 minüt. Den e gran final Lia ta mantené e mesun di 8 lugá i asina posishoná su mes den e 8 mihó landadónan di Juegos Bolivarianos 2025 den e disiplina aki.
Gaby ta kai nèt for di klasifikashon ora ku e keda na di 9 lugá ku su tempu di 1.10.15.
Damas 50 meter estilo barbulètè: E disiplina aku a konta ku 12 partisipante i Lia Pollit ta keda na di 12 lugá ku su tempu di 30.59 sekònde.
Disiplina di Tiru
Pa loke ta trata e deporte di tiru deportivo Kòrsou tin un partisipante femenino ku ta señora Ingrid Gonesh ku a kompetí den kategoria Damas pistol di airu distansia di 10 meter. Un total di 15 partisipante a kompetí i Ingrid Gonesh a kulminá e kompetensia na di 14 lugá.
Tantu tiru i landamentu ta konta ku algun dia mas di kompetensia riba diferente disiplina ainda aki na Lima, Peru.