WILLEMSTAD – Federashon Biyar Kòrsou, su presidente Michael Arvelo, ku orguyo ta anunsiá ku pa promé biaha e deporte di Biyar ta bai forma parti di un evento di siklo olímpiko.
For di 22 di novèmber pa 7 di desèmber ta tuma lugá na Lima i Ayacucho, Perú, Juegos Bolivarianos 2025. Kòrsou ta un di e paisnan ku a haña invitashon pa tuma parti na e grandioso evento deportivo i vários ramo di deporte lokal ta bai partisipá.
E delegashon di biyar ta formá pa 4 atleta i un delegado/coach. Shamir Tremus i Anthony Ibrahim lo partisipá den bola 9 individual i den dòbel, Zena Freitas lo partisipá tantu den bola 9 i Heyball, miéntras ku David Prins lo partisipá den Heyball.
Sr. Raymond Magdalena ta e delegado i alabes coach di nos delegashon. Esaki lo ta un eksperensia úniko pa nos deportistanan. Febiko ta deseá su biyardistanan i tur nos deportistanan, ku lo ta representando nos isla, tur klase di éksito.