LIMA – Pais Kòrsou, pa via di Federashon Deporte i Olímpiko Kòrsou FDOK, ta kompetiendo den e di 20 edishon ‘Juegos Bolivarianos Ayacucho-Lima 2025’ na Perú, ku a inisiá dia 22 di novèmber último i ta kulminá dia 7 di dezèmber próksimo.
E apertura ku a tuma lugá djasabra anochi a konosé un bunita seremonia inougural ku a kai na agrado di tur ku tabata presente den e históriko Fortaleza del Real Felipe na Callao. E evento a konosé un show espektakular di drone ku a impreshoná tur presente.
Mester destaká ku Kòrsou ta partisipá ku un delegashon chikitu di deportista ku lo kompetí den e siguiente ramonan di deporte: Landamentu, tiru deportivo, atletismo, biar, karate, vòlibòl i beisbòl.
FDOK ta konvensí ku nos deportistanan ta bon prepará i no ta deskartá e posibilidat di regresá kas ku algun medaya for di e di 20 edishon ‘Juegos Bolivarianos Ayacucho-Lima 2025’.
E evento deportivo, ku ta tuma lugá na e dos siudatnan Ayacucho i Lima na Perú, ta konta ku un total di 17 delegashon ku ta konsistí di mas o ménos 4 mil atleta i 1600 ofisial ku lo ta aktivo durante 16 dia den 40 diferente deporte i 57 disiplina den e di 20 edishon di Juegos Bolivarianos.
Pa Kòrsou esaki ta un oportunidat úniko pa krea lasonan di amistat i deportivo ku e paisnan bolivariano i nan demas invitadonan.