WILLEMSTAD — Resientemente FEDAKO (Federashon di Ahedres Kòrsou) a tene su kampionato infantil di ahedres 2017 den e kategoria U12. Na e kampionato di ahedres U12 ku a tuma luga e aña aki na Sentro di Bario Janwe, ta tin no menos ku 17 partisipante.
Manera tabata di spera atrobe e faboritonan den e kategoria di U12 lo tabata e dos rivalnan Fréderic Simonis kende tin 9 aña di edat i Aviandrie Kastablank kende tin 10 aña. E dos hungadornan aki ya a demonstra na diferente okashon ku nan ta relativamente fuerte pa nan edat.
Durante nan enkuentro tur dos a desaroya nan piesanan rapido i hasi rokada pa proteha nan rey. Sinembargo Fréderic ta tuma inisiativa i lansa un atake ku ta fòrsa Aviandrie drenta den un posishon di defensa. Despues di poko insistensia, Fréderic ta logra kaba e wega ku un bunita kombinashon ku a kondusi na skakmat.
Fréderic Simonis ta logra kaba e kampionato den forma invikto komo kampion nashonal kategoria U12 ku 5 punto for di 5 wega. Na di dos luga a finalisa Aviandrie Kastablank ku 4 punto i na di tres luga a termina Xavier Werleman ku 4 punto for di 5 wega. Mas a leu FEDAKo a parti premionan di motivashon na entre otro Gilian Justiana i Jorgino Quirindongo.
Por konsidera e kampeonato U12 aki un bon preparashon i motivashon pa Fréderic Simonis kende lo partisipa pronto na Carifta su kampionatonan hubenil di ahedres ku lo tuma luga den siudat di Kingston na Jamaica di 14 pa 17 di aprel proksimo. Fréderic Simonis lo biaha huntu ku 4 otro ahedresista hubenil di Kòrsou ku FEDAKO a selekta i lo kompeti den e kategoria U12. FEDAKO ta spera ku Fréderic logra un bon prestashon durante su prome enkuentro internashonal i ku tur e miembronan di nos selekshon tambe presta bon i saka kara di nos pais.