Kampionatonan Infantil di Ahedres U8 i U10

WILLEMSTAD — Federashon di Ahedres Kòrsou (FEDAKO) ku mes entusiasmo di semper ta anunsiá na ahedresistanan hóben, nan mayornan i demas amantenan di e deporte noble di ahedres ku e tempu a yega pa tene e kampionatonan anual di ahedres pa gruponan infantil.

E aña aki Trupial Inn Hotèl lo ta patrosinadó i anfitrion pa e kategorianan U8 i U10 i lo ta promé biaha ku FEDAKO ta organisá e kampionatonan pa kategorianan U8 i U10 den gruponan separá. Den pasado tur e muchanan bou di 14 aña a hunga den un solo grupo segun e sistema Suiso i na final tabata determiná kua partisipantenan tabata mihó den e diferente kategorianan di edat. Awor ku kada grupo apart, FEDAKO ta stimulá i motivá esnan di edat mas chikí i duna nan mas oportunidat pa kompetí i krese.

Lo permití e mihó 8 finalistanan di e kampionato U8 pa partisipá na e kampionato di U10 i tambe e mihó 8 finalistanan di U10 pa partisipá nan e kampionato U12 ku lo tuma lugá durante luna di mart. Tempu pa pensa pa gruponan infantil lo ta 30 minüt pa kada mucha durante kada wega i no ta nesesario pa hasi anotashon di wega.

Lo tin diferente premio pa e partisipantenan i tambe posibilidat pa klasifiká pa un kampionato di un grupo di mas edat.

Pues djasabra 11 di febrüari ta spera e ahedresistanan U8 na Hotèl Trupial Inn i djasabra 25 di febrüari ta spera e muchanan kategoria U10.

Partisipantenan mester ta presente 09:30 ‘or na Trupial Inn pa registrá i inskripshon ta kosta fl. 5,– pa kada un di e kompetensianan.

Un invitashon ta bai na un i tur pa bin mira e muchanan den akshon. Pa mas informashon por yama 512 0007 of manda un WhatsApp.