WILLEMSTAD — Ku hopi satisfakshon direktiva FDOK ta informá ku den Asamblea General di Organizacion Deportiva Centroamericano y del Caribe (ODECABE) djabièrnè 3 di febrüari, Kòrsou a wòrdu aseptá komo miembro asosiá di e organisashon ODECABE.
Esaki ta enserá ku den 2018 pais Kòrsou por partisipá na Weganan Sentro-americano i Karibe (CAC Games ) na Barranquilla – Colombia ku nos propio bandera i himno. Un logro grandi pa nos deportistanan ku for di 10-10-10 no por a partisipá den kompetensia di “Weganan”.
Ku hopi dedikashon direktiva di FDOK huntu ku CNOC, a prepará i kumpli ku e eksigensianan rekerí pa por bira miembro asosiá. Kòrsou a wòrdu representá na e Asamblea dor di Rignaal Francisca presidente i Rein Persaud sekretario di FDOK.
Un ekselente notisia pa nos federashonnan i nan deportistanan, ku ta anhelá pa representá Kòrsou den “Weganan” ku nos propio bandera i himno. Riba término kòrtiku e federashonnan konserní mester traha nan programa di preparashon, pa partisipá den kompetensia pa klasifiká.
Un danki ta bai na tur ku a duna un kontribushon i nos ta felisitá henter pueblo di Kòrsou en general tur persona i instansia ku di un o otro forma a kontribuí ku e logro aki.