WILLEMSTAD — Djarason último, 14 sèptèmber 2016, Federashon Deporte i Olímpiko Kòrsou (FDOK) a organisá den sala di reunion di FDOK, un enkuentro deportivo riba maneho di deporte 2017 – 2020 pa Kòrsou.
Propósito di e enkuentro tabata, pa presentá na tur asistente na e reunion, resúmen di e kongreso 3F (Finansa, Formashon i Fasilidat) ku FDOK a tene ku su miembronan na luna di mei 2016. Resúmen di e kongreso 3F ta duna un bista di kiko ta biba i e preokupashonnan den mundu di deporte na Kòrsou.
Tambe tabata intenshon pa mira kon leu Gobièrnu por hunga un ròl den yudansa pa aliviá e preokupashonnan aki den e periodo di gobernashon binidero. FDOK ta opiná ku mester tin un kolaborashon entre FDOK i Gobièrnu di Kòrsou pa por logra metanan i resultadonan positivo riba tereno di deporte. FDOK ta konsiderá Gobièrnu di Kòrsou un di e partnernan mas importante pa traha na bienestar di nos deporte.
Den kuadro di esaki, FDOK a tuma e inisiativa pa invitá representantenan di tur partido polítiko ku ta partisipá den elekshon di 30 sèptèmber próksimo. Durante e reunion a hasi akto di presensia representantenan di partidonan: PAS, PRO KORSOU, MFK, PAR, PAIS, MOVEMENTU PROGRESIVO, i, UN KÒRSOU HUSTU.
Presidente di FDOK Sr. R. Francisca a habri e enkuentro i a dirigí palabra na tur presente. Despues di introdukshon, Sekretario General di FDOK. Sr. R. Persaud a tuma palabra i presentá un historia amplio i dokumentashon di e hopi rapòrtnan di investigashon trahá riba deporte den e periodo di 1974 te ku 1991. Seguidamente a presentá na tur presente resúmen di e kongreso 3F. Na final di e presentashon, Presidente Sr. Francisca a duna representante di partidonan polítiko presente oportunidat pa duna nan opinion i komentario riba e presentashon i pa ekspresá kada partido su vishon riba importansia i maneho di deporte na Kòrsou. Basá riba kada komentario di esnan presente por a konkluí ku nan vishon di e maneho di deporte 2017-2020 ta kuadra ku esun di FDOK. Sr. Francisca a hasi un apelashon na kada representante di e partidonan, ku si akaso nan partido logra drenta Gobièrnu, pa nan invitá FDOK pa por forma parti den e trahamentu di e akuerdo di gobernashon riba deporte pa e próksimo 4 añanan. Tur presente a bai di akuerdo ku nan partido lo kumpli ku e petishon aki.
FDOK ku plaser i satisfakshon por wak bèk riba un enkuentro informativo i fruktífero. FDOK ta gradisí tur representante di tur partido ku a partisipá na e enkuentro aki, i sinseramente ta spera di por traha huntu ku gobièrnu binidero riba e akuerdo di gobernashon pa loke ta trata tereno di deporte. Asina FDOK huntu ku Gobièrnu por logra traha riba un maneho efektivo pa deporte pa e próksimo 4 añanan 2017 te ku 2020, ku resultadonan positivo i duradero ku lo engrandesé deporte na Kòrsou.