21 Lista di Kandidato a Keda Ofisialmente Entregá pa Elekshon 2016

WILLEMSTAD — Djaluna 8-8-2016, entre 09.00 pa 16.00’or, tur agrupashon polítiko i/òf persona ku tabata interesá por a postulá kandidato pa partisipá na elekshon di 30-9-2016.

Riba 8 di e 21 listanan ta aparesé e kantidat máksimo di 29 kandidato; riba un lista ta aparesé 25 kandidato; riba un otro ta aparesé 23 kandidato; riba dos lista ta aparesé 19 kandidato; riba dos otro ta aparesé 16 kandidato; riba 3 lista ta aparesé 10 kandidato; i riba e otro listanan ta aparesé respektivamente 7, 5, 3 i 1 kandidato, pues un total di 396 persona a keda postulá komo kandidato pa partisipá na elekshon di 30-9-2016.

Di e 21 listanan ku a keda entregá 6 (PAR, PAIS, MFK, PNP, MAN i Pueblo Soberano) ta pasa direktamente pa elekshon di 30-9-2016, pa motibu aktualmente nan ta representá den Staten di Kòrsou.

E sobrá 15 listanan, esta DP, FOL, PAN, Kòrsou di nos tur, PAS, Pro Kòrsou, Un Kòrsou hustu, Movementu Progresivo, Kòrsou Promé, 1 Tim Magno, Reskate-16, Kòrsou -Un Pais Nobo-, Partido Kooperativista i Patriótiko, PRIK i GOOL lo mester partisipá na e pre-elekshon ku ta tuma lugá riba 20 i 21 di ougùstùs, promé ku nan por pasa pa elekshon di 30-9-2016.

Konseho Supremo Elektoral ke ekspresá su satisfakshon pa e manera ordená ku tur kos a kana na ofisina di Kranshi i tambe un gradisimentu na tur e agrupashonnan polítiko ku a mantené nan mes estriktamente na e orario ku nan mester a presentá, hasiendo ku e proseso di entrega di lista a kana sin ningun inkonvenensia.