WILLEMSTAD — Federashon Biar Kòrsou, e aña aki atrobe ta forma parti di e weganan panamerikano di pool.
San Jose, Costa Rica lo ta esenario di e grandioso fiesta di biar pool. E kampionatonan aki lo tuma lugá den ‘Gimnasio Nacional de Costa Rica’ ku ta ubika den e ‘Parque Metropolitano’, den e ‘sector La Sabana’. 2016 ta un aña rèkert, mirando ku pa promé biaha lo tin partisipashon di 17 pais i un total di 162 atleta.
E paisnan partisipante ta : Mexico, Guatemala, Costa Rica, Nicaragua, Panama, Aruba, Bonaire, Republica Dominicana, Ecuador, Colombia, Venezuela, Peru, Chile, Argentina, Uruguay, Bolivia i Kòrsou. Lo bai tin kampionato panamerikano den tres diferente disiplina, Bola 10 lo konta ku partisipashon di 162 atleta, e disiplina di bola 9 tin partisipashon di 158 atleta i bola 8 ku 151 atleta.
Nos pais lo konta ku partisipashon di 11 atleta, di kual tres di nan lo bai hunga weganan kualifikatorio pa mira si nan por klasifiká pa hunga den e kampionatonan.
Esnan ku lo mira akshon dianan 9 i 10 ta Gemajel ” Jimmy” Rol, Jair Koeiman i Fauzy Halabi. E atletanan ku ta kla pa representá nos den e diferente kategorianan ta, den hubenil Shamir Tremus i Jean Clar Torbed.
Den femenino nos tòp Gernailys “Nelly” Zimmerman i Fabienne Tremus. Den maskulino, e talentoso Jeffrey Nieuwenhuijzen, Bryan Farah, Julian Rijna i Michael Arvelo ku alabes ta fungi komo hefe di delegashon. Dianan 11 i 12 lo tin bola 8 , 13 i 14 bola 10 i ta sera dianan 15 i 16 ku bola 9. Dia 17 e pareha forma pa Nieuwenhuijzen/Halabi lo ta partisipando den e weganan di dòbel bola 9.
Federashon Biar Kòrsou kier a gradisí Refineria di Kòrsou i FDOK/Gobierno pa nan kolaborashon finansiero i ta deseá su miembronan tur klase di éksito.