ST. CROIX — E selekshon nashonal di vòlibòl femenino ku e wikènt aki a kompetí den e di promé buèlta pa klasifikashon Mundial den Grupo A na St.Croix, US Virgin Islands despues di a gana di tantu Turks and Caicos komo Barbados ku skor konvisente di 3-0 ayera no a tene kompashon ku e ekipo di kas i a derotanan tambe ku skor di 3-0.
E selekshon di Kòrsou den e serie aki a hunga tremendo vòlibòl i tabata superior na su kontrinkantenan. Djasabra anochi e seksteto di Turks and Caicos a sufri un derota di 3-0 ku parsialnan di 25-9,25-7,25-4 na man di nos selekshon.
Djadumingu mainta nos selekshon siguiendo ku su racha viktorioso a derota e selekshon nashonal di Barbados ku skor di 3-0 parsialnan di 25-11, 25-21, 25-14. E úniko set ku Barbados e duna resistensia tabata den e di dos set.
Den e final di e promé buèlta nos selekshon nashonal a pone su igual di US Virgin Islands tambe un banda ku skor di 3-0 i asina terminá nan promé kompromiso den e klasifikashon mundial 2018 ku un rèkert di 9 sèt ganá i sero sèt pèrdí.
Ku e viktoria aki nos selekshon nashonal otro aña na yüli lo pasa pa e rònt di Norceca pa hunga e di di dos buèlta di e klasifikashon pa mundial. Esaki lo tuma lugá na Jamaica.
Aparte di e viktoria aki nos selekshon a bari ku 7 premio individual.
Ghislaine St.Hilaire a sali Best opposite; Samira Luis komo e Best Digger; Christine Anthony ku 5 premio, Best Receiver, Best Spiker, Best Server, Best Scorer i ela sali tambe e MVP di e torneo.
E selekshon nashonal ta yega djamars dia 9 di ougùstùs 14:15 via Miami for di St.Croix, Virgin Islands.
Federashon di vòlibòl Kòrsou ta orguyoso di e prestashon di e selekshon aki I ta pidi tur fanátiko di vòlibòl pa bai risibí e hóbennan aki na nan yegada djamars awor.