Prestigioso proyekto di FDDK ta drenta último fase

WILLEMSTAD — Djaweps último, dia 4 di ougùstùs, e prestigioso proyekto di FDDK “Pedagogia Deportivo” a avansá pa su último fase ora ku ofisialmente a introdusí e tres trainernan aspirante di Kòrsou pa ku e proyekto aki.

E proyekto “Pedagogia Deportivo” ta enserá ku dosentenan lokal ku tin nivel di HBO kombiná ku instruktor nivel MBO lo sigui un kurso di pedagogia konhunto partí na dos nivel. E meta prinsipal siendo un kapasitashon di e dosentenan nivel HBO pa den futuro nan mes duna e kurso riba nivel lokal i paralelo na esaki un kurso ku e meta pa sertifiká algun hóben instruktor di deporte ku ya kaba tin nan sertifikado nivel MBO di entre otro CIOS i CDC.

Ku e sertifikado di pedagogia aki e instruktornan nivel MBO por asistí den lès di edukashon físiko den skolnan di enseñansa di fundeshi.

FDDK ya pa vários tempu aktivamente ta propagandá kapasitashon di instruktornan ku e asina yamá “Sport Pedagogisch Getuigschrift” pa asina entre otro, halsa e nivel na spesífiko enseñansa di fundeshi pero tambe pa kumpli ku rekisito legal pa por duna lès independiente di deporte i moveshon.

Despues di un periodo di aklimatisashon kòrtiko pa e dosentenan kubano e kurso intensivo “Pedagogia Deportivo” di tres luna lo kuminsá ofisialmente den luna di ougùstùs aki.

FDDK ta spera ku a largo plaso su inisiativa i aporte pa halsa nivel di formashon deportivo pa en partikular e hubentut den enseñansa di fundeshi, lo tin un futuro “spin off” positivo.

Dor di un formashon pedagógiko mas fuerte e futuro dosentenan por logra diferente efekto positivo riba diferente tereno, entre otro riba aktuashon sosial, salubridat públiko (en partikular e guera kontra obesitas) pero tambe riba nos prestashon deportivo internashonal en general. E proyekto aki ta wòrdu finansiá pa Fundashon Konstruí Awe i Mayan.

FDDK su meta final ta pa trese kambio den nos struktura di edukashon físiko ku ta kompletamente destrosá. Edukashon físiko ta base di nos deporte!

Riba potrèt por mira drektor di FDDK, sr. Thakai Doran huntu ku e tres futuro dosentenan Laennon Rumay, Clinton Phelipa i Corgelino Djaoen, akompañá pa managernan Willy “Junny” Harms i Naïsha Santiago di FDDK.