WILLEMSTAD — Manera ta ampliamente konosí, djaweps tras di lomba tabata e último dia di e fakansiplan di FDDK; un fakansi plan ku mester bisa tabata eksitoso! Durante di e 6 dianan a hasi konteo, kua a hiba na un total di 14.090 persona ku a bishitá fakansi ku deporte na SDK. Aparte di algun akontesimentu ku a tuma lugá pafó di e kompleho deportivo momentu ku ya e evento a terminá, e evento a kana bon sin mayor insidente.
E fakansi plan ta un di e proyektonan di mas grandi di FDDK, unda 90 boluntario huntu ku personal ta traha pa ofresé nos komunidat, nos muchanan un distrakshon den temporada di fakansi; un proyekto ku ta rekerí hopi tempu di preparashon i tambe tin hopi gastunan finansiero.
FDDK ta sumamente agradesí na UTS, MCB i Refineria Isla kendenan huntu ku gobièrnu di Kòrsou a yuda hasi e proyekto aki un biaha mas posibel.
Gerensia di FDDK ta ekstendé un palabra di gratitut tambe na VKC, Securitas, Pinedoe Security, Rode Kruis, medionan di komunikashon, nos boluntarionan, personal i tur otro persona i/òf instansha ku a yuda na éksito di e proyekto aki.
Na esnan ku no a logra yena e enkuesta, tin oportunidat pa partisipá ainda. Por subi riba e página di Facebook, www.facebook.com/deportekorsou, i yena esaki. Djaluna dia 8 di ougùstùs lo anunsiá e ganadó!