WILLEMSTAD — For di promé di aprel último, atletismo di Kòrsou ku intermediashon di Fundashon Desaroyo Deporte Kòrsou(FDDK), ta disponé di un coach cubano den persona di Luis Varona Moret. Coach Luis ta na Kòrsou pa yuda den preparashon di atletanan lokal ku bista riba CARIFTA 2017 ku lo tuma lugá aki na Kòrsou dianan 16, 17 i 18 di aprel 2017 den Stadion Ergilio Hato, SDK. FDDK i Curaçaose Atletiek Bond (CAB) a firma un akuerdo di koperashon mediante kua FDDK riba e diferente areanan ta duna su sosten na CAB pa e evento regional aki.
Luis Varona Moret tin 38 aña di eksperensha komo treiner di atletismo. El a optené su Master den Deporte i Edukashon Físiko na Universidad de Cuba. Durante di varios aña el a traha na e país afrikano Burkina Faso i despues tambe na Venezuela, ku amplio eksperensha den Weganan Afrikano, Weganan Sentroamerikano i di Karibe, Weganan Panamerikano i Kampionato Mundial. Ademas, e ta wes di atletismo i treiner pa Special Olympics.
De Ron Machine Shop tambe ta partner den e proyekto aki ku kubrimentu di gastunan di e coach, mientras ku dòkter Wallid Elhage lo bai buta su konosementu disponibel pa huntu ku un tim prepará e atletanan pa 1 aña largu i analisá biomekánika, ku ta parti importante di deporte moderno.
Coach Luis Varona Moret además di ta bira e coach pa e disiplínanan di lansamentu(diskus, bala di heru, speer), lo bai traha huntu ku otro téknikonan ku e guia general di parti di FDDK pa loke ta trata e trabounan ku lo tuma lugá pa CARIFTA 2017.
Mientras tantu, e coach cubano durante di seis dia pa siman ta aktivo riba tereno ku atletanan ya establesí komo tambe hóbennan ku a keda reklutá durante luna di aprel último. Den siman parti atardi e ta na SDK di 5’or pa 7’or, mientras ku djasabra mainta e ta aktivo riba vèlt di Barber di 10’or pa 11.30’or.