WILLEMSTAD — Ya pa di dos aña konsekutivo, Sport en Ontspannings Vereniging di Brandweer Korsou ta organisa e kaminata ku ta hiba di nomber “Firefighters Walk”. Aña pasa mas di 1500 persona a partisipa durante di e kaminata organisa pa miembronan di Brandweer Korsou i a kana durante kayanan di Otrobanda.
E aña aki tin kambionan GREAT den e kaminata di “Firefighters Walk” aki, kaminda ku lo sali for di Post di Brandweer na Steenrijk pasa den kayanan di Punda i Otrobanda i termina na Playa Parasasa. Tambe SOV Brandweer a komplase tur esnan ku a pidi pa hasi e ruta mas largu i nos lo tin un ruta di 10KM ku lo pasa via di Brug Juliana. Pa prome bes lo bo por krusa Brug Juliana na pia kanando for di Punda pa bai Otrobanda. Pues algu ku nos partisipantenan lo bai gusta sigur.
Ruta di 7 of 10 KM
Ruta di e kaminata pa djadumingu proksimo lo ranka Sali for di 6or di mainta na Kazerne di Brandweer na Steenrijk ku un tremendo warm-up. Pa mitar di 7 di mainta lo start Sali, unda lo pasa den kayanan di Steenrijk, Oranjesstraat bai direkshon di Abraham de Veerstraat of Concordiasstraat. E partisipantenan ku skohe ruta di 7 KM lo sigi via di De Ruyterkade I bai pasa den kayanan di Punda, mientras e partisipantenan ku kier kana e ruta di 10KM lo pasa via di Waaigat I bai subi Brug Juliana. Tur dos ruta lo topa otro bek na Rotonde Ergilio Hato na Otrobanda, unda ku lo sigi kana via di Pater Eeuwensweg, Helmin Wiels Bulevard pasa rotonde Beto Adamus I bai termina na Playa Parasasa.
Karchinan pa Firefighters Walk
SOV Brandweer kier enfatisa ku a sobra algun karchi na benta pa Firefighters Walk I ku por kumpra karchi e dianan aki for di 9or di mainta – 9or di anochi na Kazerne di Brandweer na Mundu Nobo. Pues hinter dia por pasa na Mundu Nobo, kumpra bo karchi, paso djaweps awor 31 di Mart 2016 lo reparti tshirtnan for di 5or di atardi na Ofisina di Brandweer na Roodeweg. Karchinan pa Firefighters Walk ta na rason di 15 florin kual ta inklui un tshirt, konsumo durante ruta I despues na final na Playa Parasasa tin fruta, I tambe un Goodie Bag pa tur nos partisipantenan. Pa kualkier informashon of benta di karchi pa Firefighters Walk 2016 lo por tuma kontakto ku 693 – 4666 of 527-7282 of 529-2222. Of tambe por like nos Facebook page di SOV Brandweer unda lo por risibi tur informashon di Firefighters Walk 2016.