WILLEMSTAD — Awe 23 di mart ta kumpli 85 aña, ku fundeshi di aktual Federashon Deporte Olímpiko Korsou (FDOK) i tambe NAOC a keda formalisá. Un pabien i palabranan di apresio na tur dirigente ku a forma parti di e organisashonnan konserní ku awendia ta karga e nòmber FDOK. Un palabra di gratitut pa tur federashon i nan klupnan afiliá, nan deportistanan, ku a forma parti di e famia deportivo durante 85 aña. Un danki na tur dirigente atministrativo ku a duna nan aporte komo miembro di direktiva di federashon i tambe di nan klup di deporte. Un ekspreshon di rekonosementu pa tur entrenadó, coach, masahista, médiko, para médiko, ku a prepará deportistanan pa kompetensianan lokal i internashonal. Un gratitut na tur dirigentenan ku a invertí tempu den guia di kompetensia, komo skorer, rèfri, umpire, ofisial di liña, ofisial di tempu ets. Tur e personanan ariba menshoná ta tin un aporte kolektivo signifikante na e desaroyo di deporte pa nos pais Korsou. E istoria riba tur tereno i den tur sentido ta hopi interesante. Komo teritorio, a inisiá primeramente komo pais “Curacao en de onderhorigen’, despues komo pais Antia Ulandes i awendia ta pais Korsou nos deportistanan ta representá.
Mas interesante ta bira si wak e desaroyo komo organisashon i tambe e nòmber konserní. Primeramente a inisiá komo Curacaose Bond voor de Lichamelijke opvoeding (CBLO) ku a keda fundá 23 di mart 1931. Dia 15 di mei 1950 a risibí rekonosementu di IOC.
Remarkabel ta ku dia 25 di aprel 1950, CBLO a keda kambiá pa NABLO (Nederlands Antilliaanse Bond voor de Lichamelijke Opvoeding). Mas interesante ta e echo ku – diesun aña despues- dia 11 di yüli 1961 a trese un kambio fundamental ku ta tin su konsekuensia pa e forma ku a manehá deporte na nivel gubernamental i nivel partikular. A disolvé NABLO, ku a keda remplasá pa no ménos ku 3 entidat. E promé ta VECUSPO ( Verbond Curacaose Sportorganisaties) ku a bira despues CSF (Curacaose sport Federatie, ku a bira CSOF (Curacaose Sport en Olympische Federatie) i despues te awe ta FDOK (Federashon Deporte i Olímpiko Korsou). E di dos ta SES (Stichting Exploitatie Sporttereinen). E di tres ta Nederlands Antilliaans Olympisch Comite (NAOC) ku despues di 2012 no ta aktivo mas.
Dia 23 di aprel próksimo durante seremonia i inougurashon di miembronan di salon di fama FDOK lo duna atenshon na e selebrashon di 85 aña di deporte organisá na Kòrsou.
Un pabien kaluroso na mundu di deporte di Kòrsou. Alabes un danki super spesial na e siguiente entidatnan ku durante 85 aña ta tin i te awe tin un sosten hopi signifikante i balioso pa nos mundu di deporte: gobièrnu, spònsernan, prensa i tambe pueblo di Korsou ku a sostené kompetensia di deporte ku nan presensia. Masha pabien i danki pa 85 aña di sosten.