WILLEMSTAD — Federashon Deporte i Olímpiko Korsou (FDOK) a drenta un periodo sumamente krusial i interesante pa Korsou komo pais i mundu deportivo en partikular.
Dia 16 próksimo un delegashon di FDOK konsistiendo di sr. R. Bottse (konsehero), sr R. Persaud (sekretario FDOK/konsehero) i sr. R. Francisca (Presidente FDOK ántes Curacaose Sport en Olympische Federatie) ta sali pa Lausanne Suisa pa e seshon final den e kaso kontra Komité Olímpiko Internashonal (KOI) pa rekonosimentu di Pais Korsou komo miembro.
E último tratamentu aki lo tuma lugá dia 20 i 21 di yanüari 2016 den korte na Laussane – Suisa.
For di 10-10 -10 dia ku Pais Korsou a bira un pais outónomo e deseo a lanta pa Pais Korsou por kompetí den weganan olímpiko ku su propio representashon deportivo, ku su propio himno i bandera.
Lástimamente esaki no a sosodé i einan un lucha intenso di FDOK den koperashon ku Gobièrnu di Korsou a kuminsá di manera ku Korsou por logra e meta ei.
P’esei dia 20 i 21 di yanüari benidero e representantenan di FDOK huntu ku e abogadonan internashonal lo tin e tarea históriko pa konvensé korte na Lausanne ku Korsou ta un pais di bèrdat, un pais digno ku meresé rekonosementu olímpiko. Ademas , ku nos struktura konstitushonal tin tur aspekto pa konsiderá nos un estado òf pais independiente, ku Korsou ta ser akseptá total den nos region komo pais.
Lo enfatisá i prueba ku Korsou tin un struktura deportivo struktura i serio, ku ta un di e eksigensianan di Charter olímpiko i regular ta produsí deportistanan di nivel regional, kontinental i asta mundial den diferente ramo di deporte.
Ku otro palabra KOI no tin motibu bálido pa tene Pais Korsou afó, pero pa aseptá pais Korsou komo digno parti di mundu ku derechi pa representá su mes na tur plataforma internashonal inkluso ku su nòmber KORSOU i su bandera ta waya durante weganan regional, kontinental i olímpiko. T’esei tabata i ta e meta di e lucha di FDOK.
FDOK ta yama danki na gobièrnu i pueblo di Korsou den su totalidat ku a sostené e lucha aki i ku kada persona na su manera, lo sabi di manda vibrashon positivo riba e asuntu aki ku ta den su rekta final di manera ku por yega na un veredikto na fabor di nos dushi pais Korsou.