Ken Ta Tapa Ken: Show di fever, drifting i stunt

WILLEMSTAD — Kòrsou lo ta anfitrion di un evento magno sigur pa e amantenan di akshon. Dia 22 di novèmber awor na Curacao Race way lo bai tin e evento titulá “Ken Ta Tapa Ken”. QDC Productions a uni forsa pa brinda Kòrsou i amantenan di fever, drifting i stunt un espektákulo tur afó. Riba e dia aki lo bai tin akshon di fever, drifting i stunt entre diferente koredó di outo, quad i motersaikel i tambe direktamente for di Merka lo tei e kampion mundial, e number 1 firmá pa Dream Chasers, kende ta Chino MMG ku ta kai bou di label di Rick Ross i Meek Mill. Chino ta bin duna Kòrsou un show live. Tin diferente challenge ku a kai aki na Kòrsou entre pariba i pabou, miéntras ku lo bai tin un revancha formal entre Boneiru i Kòrsou den e kategoria di quad.

Kòrsou ta bai mira akshonnan di outo, crosser i motersaikel den fever, drifting i stunt i pa promé biaha lo bo por ta testigu na momentu ku un avion ta bai pèrsigui un outo.

Banda di e espektákulo deportivo aki e parti farándula tambe lo ta bon sirbí ku bon ambiente ora ku lo bai tin presentashon di Easy Money Gang, DEZZ, RESHINE, MRAIZZ, dj Atley, Mc Monti i Mc. Jadira Bislick.

E evento aki ta di 16.00 or pa 22.00 or. Ya tin karchi na pre benta na rason di Naf.25 na Beep Beep, Tik Tak Punda, 24 uur Uit de Muur na e pòmp di gasolin na Sta. Maria i tambe na Mensing Caminda. Mucha te i ku 12 aña ta 15 florin.

Riba e dia di e aktividat mes esta 22 di novèmber na porta karchinan lo bira Naf. 35,00 i mucha te 12 aña ta keda 15 florin. Pues probechá buska esun di bo for di awor pa bo no pèrdè nada di e espektákulo grandi aki ku Kòrsou ta bai ta testigu di dje i ku pa hopi tempu lo bo keda komentá. Un danki spesial ta bai na Licores Maduro, Vista Tire Center, CATIS NV., Cannabis Energy Drink, Don Andres N.V., Zapp Batteries, Allstar Embroidery, Emergency Printing, Hulk Towing i The Ultimate Motors.