Ekipo Perfect Bartenders kampion A-klas di pinpòn

WILLEMSTAD- Djasabra último Federashon Tènis di Mesa Kòrsou tabatin e gran final pa ekipo den kategoria A-klas. Ku un basta bon asistensia di parti di e fanátikonan di bon pinpòn e ekiponan di Perfect Bartenders i Parts for You a sali ku masha entusiasmo enfrentando otro. E rivalidat deportivo tabata notabel, komo no ta poko kos a wòrdu papiá ora mester a kambia e fecha  pa e partido aki.

E ekiponan tabata formá komo lo siguiente.

Perfect Bartenders: Michael Dalnoot, Devon Meilink i Henny Metry

Parts for You: Dimitri Leon, Ronaldi Vos i Giancarlo da Costa

E promé partido ta ranka sali i ta bira e mihó partido di e anochi aki. Dimitri i Michael a faha ku otro pa finalmente den un ful mihó di 5 Dimitri sali di e porta grandi ganando Michael 3-2 ku e parsialnan pèrta di 7-11 / 14-12 / 12-10 / 10-12 /  11-8;

E di 2 partido Devon Meilink ta gana di Ronaldi Vos ku skore di 3-1 i empata e partido na unu. E parsialnan tabata 11-7 / 8-11 / 11-6 / 12-10;

Despues a sigui e partido dòbel ku hopi biaha ta bira e partido krusial. Perfect Bartenders ku e duo Henny Metry i Devon Meilink ta sali desidido pa destroná e kampeon di aña pasá. Den promé instansia nan a haña algu di resistensia, pero despues ta bin gana tòg fásil 3-1 i pika dilanti 2-1. E parsialnan tabata 11-7 / 7-11 / 11-4 / 11-7.

E di 4 partido Dimitri a sali ku un solo meta. Hiba e partido final aki na e di 5 wega desisivo. Fásilmente e ta pasa riba Devon Meilink i ta gana su dos partidonan. E skore a resultá 3-0 ku parsialnan 11-9 / 11-6 / 11-9;

Ku e partidonan empatá na 2 a bin e di 5 partido ku a definí e kampeon. Michael no a duna Ronaldi ningun chèns pa drenta den su wega i ta duna Perfect Bartenders e título di kampeon di ekipo A-klas 2015. E skore final tabata 3-0 ku parsialnan 11-8 / 11-4 / 11-5.

Un pabien na Perfect Bartenders: Michael Dalnoot, Devon Meilink i Henny Metry.