WILLEMSTAD — Swimming Club Orca Curaçao huntu ku Fundashon Pa Nan ta organisá “This is it Swimming Marathon”. E nòmber ta papia pa su mes! Ta un kompetensia di landamentu. Pa 12 ora tras di otro lo tin un kantidat di 400 atleta ta landa riba un speed haltu den pisina Bennie Leito na Rif.
Djasabra, 24 di òktober for di 8or di mainta te ku 8or di anochi pisina
Bennie Leito lo ta e atrakshon di dia kaminda nos atletanan di natashon lo ta kompetí den nan deporte di preferensia. E kompetensia lo ta unu sumamente interesante ya komo di kada tim lo tin atletanan di diferente edat ta kompetí. Lo tin 4 kategoria di edat repartí den e kategorianan: U10, U 13, U 17 i 18+.
Loke ta hasi e “This is it Swimming Marathon” mas kompetitivo ta ku no tin premio pa kategoria sino premio pa e tim ku su atletanan a landa mas biaha di un banda pa otro di e pisina. Na final di e máratòn ku ta 8or di anochi, ta e tim ku e atletanan a landa mas tantu biaha bai bini ta e ganadó.
E timnan di landamentu, skolnan sekundario i otro organisashon di natashon tambe por a inskribí pa landa pa rekreá i nan tambe lo bini ku un tim di hóben pa landa durante 1 ora di nan eskoho sin stòp.
Banda di e “This is it Swimming Marathon” lo bai tin diferente otro aktividat informativo i rekreativo. Lo tin stènt di informashon di tur e timnan di landamentu kompetitivo ku ta aktivo den e deporte di natashon na Kòrsou. Durante dia tin charla ku ta trata reglanan di: waterpolo, landamentu kompetitivo i landamentu sinkronisá. Tambe tin un área rekreativo speshal pa nos mucha entre 4 pa 12 aña. E mucha por bai den “bouncer”, pinta kara i tambe landa den e pisina chikí.
Entrada lo ta grátis. Tur hende ta bon bini pa bin apoyá nos atletanan i risibí tur informashon tokante e deporte di natashon.
E organisashon di Swim Club Orca Curaçao i Fundashon Pa Nan tur dos ta organisashonnan nobo ku ta kere ku deporte ta un base importante pa desaroyo di nos hóbennan. “This is it Swimming Marathon” ta e promé máratòn di natashon ku Orca i Fundashon Pa Nan ta organisá. E intenshon ta pa e máratòn aki por ripití tur aña kaminda nos atletanan por demostrá nan abilidat den e rango di deporte di natashon.
Swim Club Orca Curaçao, Typhoon Swimming Club, Sithoc Swimteam
Curaçao, Bulado Swim Club, Curaçao Sharks Aquatics, St Jozef VSBO, Jacques Ferrandi VSBO, Goslinga VSBO, Special Olympic, Pisina Bennie
Leito, Djaoen Swimming Center, Aqua Jogging, Zweminrichting Piscadera. Esakinan ta tur e timnan, skolnan i organisashonnan ku ta partisipá. Nan ta konta ku asistensia i apoyo di Kòrsou kompleto pa apoyá nos atletanan. Si abo komo hóben tabatin pensa pa kuminsá práktika e deporte di natashon, hasi uso di e oportunidat úniko aki pa mira tur tim den akshon i skohe pa bo mes.
Nos ta topa djasabra, 24 di òktober 2015 for di 8or di mainta na Pisina Bennie Leito na e “This is it Swimming Marathon”.