ITALIA — Siman pasá, for di 29 di yüni te ku 4 di yüli, 2015, e kompetensia Mundial di windsurfing – IFCA JYM Slalom World Championship 2015 – a tuma lugá na e bunita sitio di Reggio Calabria. E prestigioso Kampeonato Mundial aki, ku ta konosí den e mundu di windsurfing pa su nivel masha haltu, tabatin 71 windsurfer profeshonal for di Fransia, Italia, Austria, Noruega, Peru, Spaña, Slovenia, Hulanda, Aruba i Kòrsou, kende a partisipá den e kategorianan di ‘Junior’, Hubentut, Masters 35+, Hubentut i ‘Junior’ pa Mucha Muhé.
Kòrsou tabata bon representá den e kategoria ‘Junior’ U-17 pa e talentoso ‘Windsurfer’ i Kampeon Mundial ‘Junior’ U-15 na 2013, Jean Paul Da Silva De Goes, di 16 aña di edat.
Aruba tambe tabata bon representá den e kategoria di Hubentut pa e Kampeon Mundial ‘Junior’ U-15 na 2011 i ‘Junior’ U-17 na 2012 pa Ethan Westera, i pa Nik van den Eerenbeemt i Mark Tjon.
Durante e tres dianan promé ku e evento, e windsurfernan a trein den bientunan di un averahe di 16 nudo pa ora, pero durante e sobrá di e siman e bientu a baha konsiderablemente, loke a obligá tur e partisipantenan pa usa nan ekipo mas grandi durante henter e kompetensia. Riba e promé dia di e kompetensia tabatin un bientu mínimo di 11 nudo, loke tabata sufisiente pa a inisiá e promé eliminashon pa tur kategoria. Pero djis despues e bientu a baha, di moda ku no tabata posibel pa finalisá e promé eliminashon riba e dia ei.
Durante e di dos i di tres dianan Mama Naturalesa a nenga di koperá, loke a hasi imposibel pa por a kompetí debí na tiki bientu. Riba e di kuater dia e bientu kayente a kuminsa supla mainta trempan, loke a hasi posibel ku por a kompletá e promé i e di dos eliminashon. Riba e di sinku dia (e último dia di e kompetensia) a logra efektuá dos eliminashon mas, p’asina henter e flota di partisipantenan den kategoria ‘Junior’ i ‘Hubentut’ keda finalisá, ku bientunan mínimo di 11 nudo, ku ta aseptabel segun reglanan di e kompetensia. Despues di 12 pustamentu pa un total di 4 eliminashon, di kual esun di mas malu a keda deskartá, e resultado di nos hóbennan Hulandes-Karibense tabata ekselente.
KÒRSOU: Ku un enorme demostrashon di talento, velosidat i profeshonalismo, e kompetensia riba awa tabata un bataya kontínuo entre Kòrsou, Fransia i Italia. Kompetiendo den su kategoria entre 31 di e atletanan mas eksperensiá i rápido di tur parti di mundu, e hóben windsurfer Jean Paul Da Silva De Goes a kompetí ferosmente riba awa kontra e kampeon di Oropa di 2015, e Franses Jimmy Thieme, i a mantené e promé puesto te na e último minüt den su kategoria durante tres di e kuater salidanan di e kompetensia. Durante e di kuater salida Jean Paul a pèrdè un tiki velosidat, pa motibu di kaída di bientu un ratu nèt ora e tabata nabegá rònt di e promé bui, anke ku e tabata husa su ekipo mas grandi, ku e konsekuensia ku el a pèrdè su posishon den e final di e ganadornan. Desafortunadamente, esaki a resultá den un puesto mas abou den e resultadonan total.
E inkonbenensia aki tabata na bentaha di e kompetidor Franses, kende a rekuperá di su fayonan riba e promé dia, i a sali ganador den e último salida i konsekuentemente a sali Ganadó di e Kampeonato Mundial, ku un diferensia mínimo den punto, siguí mesora pa nos Yu di Kòrsou, Jean Paul Da Silva De Goes, awor e ‘Vice World Champion’ U-17, na di dos lugá, i Mathis Guillou di Fransia den e di tres lugá.
ARUBA: E bataya entre esnan mas rápido den e kategoria ‘Hubentut’ tabata entre e talentonan profeshonal di Aruba, Ethan Westera, Fransia i Slovenia. Ethan Westera, ku un velosidat manera wélék, tabata na promé lugá durante henter e kompetensia, pero un fayo chikitu na prinsipio di e di kuater salida a pone ku el a pèrdè su promé puesto, i a bira e ‘Vice World Champion’ 2015 den e kategoria ‘Hubentut’. E promé puesto a bai pa e Franses Nicolas Goyard i e di tres puesto pa Basile Jacquin, tambe di Fransia. Ku un tremendo prestashon Nik van den Eerenbeemt di Aruba a logra e di kuater puesto.
Den ‘Hubentut Mucha Muhé, e ganador tabata Marie Somonet di Fransia. Den ‘Juniors’ U-17, e ganadó tabata Oceane Bellon di Fransia. Den e kategoria ‘Masters 35+’ e ganadó tabata Andrea Rosati di Italia.
Nos pabien ta bai pa nos hóbennan Karibense-Hulandes pa nan ekselente prestashon. Un danki spesial ta bai pa e spònsernan individual pa nan sosten. Sin nan yudansa e partisipashon di nos atletanan lokal den eventonan internashonal lo no tabata posibel. Pa mas informashon riba e evento aki, bishitá e ‘link’ riba e página IFCA di FB https://www.facebook.com/pages/IFCA/157643720947394