MERKA — Durante di e kompetensianan di atletismo organisá pa Star Athletics, Churandy Martina a logra kore e tempu límite pa klasifiká pa Mundial di atletismo e aña aki an Peking, China i tambe Olimpiada otro aña riba 200m.
Churandy a logra su klasifikashon koriendo un tempu di 20.37 sekònde. E tempu límite pa klasifiká pa ambos evenemento tabata di 20.50 sekònde.
“Apesar di kansansio mi a kore un bon 200m den 20.37 sekònde,” Churandy a bisa despues di e kareda. E atleta tabata poko kansa despues di a kore 100m mas trempan.
Den e final di 100m Churandy a logra kore un tempu di 10.18 sekònde. Esaki net no tabata sufisiente pa logra klasifikashon pa Mundial tampoko pa Olimpiada. E límite pa e Mundial na Peking ta 10.16 sekònde miéntras ku pa Olimpiada e tempu ta 10.14 sekònde.
Churandy ta opiná ku e kareda di 100m a bai bon i ku e ta sinti ku e ta hañando su velosidat bek.