MERKA — Den wikènt tras di lomba na e evento di Tom Jones Memorial Classic na Gainesville Florida, Liemarvin Bonevacia a mehorá su rèkert Hulandes riba 400 meter. Na e evento aki Liemarvin a logra kore un tempu di 45.40 sekonde. Di e manera aki Liemarvin a mehorá su propio rèkert di 45.41 sekònde ku e la kore aña pasa den e kampionato Nashonal Hulandes.
Banda di Liemarvin tambe Churandy Martina, Hensley Paulina i Terrence Agard a partisipá den e Tom Jones Memorial Classic. Churandy a partisipá den e eventonan di 4×100 meter relevo i 200 meter. Den e 4×100 meter relevo Churandy a kore den ekipo ku entre otro Hensley Paulina. Akinan nan a finalisá na promé lugá ku un tempu di 39.23 sekònde.
E evento di 200 meter tambe a resultá un viktoria pa Churandy. Akinan e atleta a logra un tempu di 20.69 sekònde.
Banda di kore 4×100 meter, Hensley Paulina a kore den e evento di 100 meter i akinan a kore un tempu di 10.40 sekònde.
Terrence Agard a kore huntu ku Liemarvin den e evento di 400m i a logra un tempu di 46.09.
Tur e atletanan aki lo partisipá dia 2 i 3 di mei próksimo huntu ku e selekshon Hulandes na e kampionato Mundial di Relevo na Bahamas. Riba 4×100 meter e selekshon Hulandes ta konsistí di entre otro Churandy Martina, Hensley Paulina i Brian Mariano. Miéntras ku Liemarvin Bonevacia, Terrence Agard i Obed Martis lo ta den e ekipo di 4×400 meter.