WILLEMSTAD – E kaso kontra Elvis ‘Monster’ Kuwas a kontinuá ayera. Den e seshon di ayera fiskal Sr. Gert Rip a pidi un kondena di bida largu pa Kuwas. Di otro banda e abogado di Kuwas, Sra. Olga Saleh-Kostrzewski a pidi pa Hues no aseptá e kaso ku a keda trese dilanti pa Ministerio Públiko.
Den su rekisitorio fiskal Sr. Rip a pasa riba tur e pruebanan ku Ministerio Públiko tin den kontra di Kuwas. Ta trata aki di primariamente deklarashonnan ku e propio akusado a hasi i tambe deklarashon di otronan den kontra di e akusado. Tambe Ministerio Públiko a logra haña evidensia di sierto echonan a base di komunikashon ku a keda di tap. E uniko prueba tékniko ku fiskal a presentá ta un análisis di e lokalisashon di e telefòn selular di Kuwas. Ministerio Públiko a trese un eksperto for di Hulanda pa analisá den ki area e telefòn selular tabata riba 5 di mei 2013.
Abogado di Kuwas, Sra. Saleh-Kostrzewski na su turno no ta di akuerdo ku e forma ku Ministerio Públiko a optené e deklarashonnan den kontra su kliente. Segun e abogado, e deklarashonnan ku a keda hasi den kontra di su kliente e keda hasi bou di promesa di algu for di Ministerio Públiko. Tambe Sra. Saleh-Kostrzewski ta di opinion ku e deklarashonnan hasi kontra Kuwas no ta kuadra ku bèrdat. Pa loke ta trata e konfeshon di Kuwas, e abogado ta di opinion ku Kuwas a hasi esaki bou di preshon i sin representashon di su abogado.
Fiskal Sr. Rip den e seshon di ayera a hasi su máksimo pa proba su kaso kontra Kuwas. Sin embargo ta di wak kiko Hues ta bai hasi ku e defensa ku Sra. Saleh-Kostrzewski a presentá. Ta konvensente ku Kuwas ta involukrá den e akusashon kontra dje pero e manera ku e deklarashonnan kontra Kuwas a keda optené ta trese duda i ku tur probabilidat Hues lo bai konsiderá esaki den su desishon final. Kuantu konsiderashon Hues lo duna esaki lo bai ta di sumo importansia teniendo na kuenta ku e por tin no solamente efekto riba e kaso kontra Kuwas pero tambe den henter e Kaso Magnus i Maximus.
Falta di pruebanan tékniko a hasi Ministerio Públiko sumamente dependiente di deklarashonnan. Pruebanan tékniko lo a kita hopi di e peso for di e deklarashonnan i laga Ministerio Públiko ku un kaso muchu mas fuerte.