WILLEMSTAD – E promé dia di e kaso Magnus ta tras di lomba. Un dia ku a kuminsá kaminda tur e kuater akusadonan den e kaso a tende e akusashonnan ku tin den na kontra.
E akusado prinsipal, kual ta Elvis ‘Monster’ Kuwas a tende sinku akusashon den su kontra. Ta trata di tres kaso di asesinato, un kaso di atrako i poseshon ilegal di arma di kandela. Segun Ministerio Públiko, e asesinatonan ku ta riba konsenshi di Kuwas ta esun di Sr. Helmin Wiels dia 5 di mei 2013, e asesinato di Raikel Conception dia 27 di yanüari i tambe e asesinato di Lionel Arnaud dia 8 di yüni 2012.
E akusado Dangelo ‘Panchèk’ Damascus ta keda akusá di ta enbolbí den dos kaso di asesinato, unu ta e asesinato di Sr. Helmin Wiels i e otro ta e asesinato di Raul ‘Bolle’ Martinez. Tambe Damascus ta wòrdu akusá di dos atrako arma i tambe poseshon di arma di kandela.
E otro akusado, kual ta Carlos Pieter ta keda akusá di partisipashon den e asesinato di Sr. Helmin Wiels i tambe su partisipashon den un atrako arma. Segun Ministerio Públiko, Pieter lo mester a sòru pa transporte di Elvis ‘Monster’ Kuwas, Raul ‘Bolle’ Martinez i/of otronan despues di e krímen
Burney ‘Nini’ Fonseca tin un akusashon na su kontra, i esei ta di a indusi entre otro Elvis ‘Monster’ Kuwas pa kometé asesinato di Sr. Helmin Wiels i rekulta otronan pa kometé e asesinato.
Despues ku Hues a presentá e akusashonnan kontra di e kuater sospechosonan a sigui ku e deliberashon prosedural di e kaso i tambe deliberashon riba si lo transmití oudio for di korte si of no. E ultimo aki a keda un biaha mas aprobá pa Hues.
Parti mèrdia a kuminsá ku e tratamentu di e akusashonnan kontra e akusado prinsipal kual ta Elvis ‘Monster’ Kuwas. Akinan e akusado a desmentí di ta enbolbí den e kaso di asesinato di Sr. Helmin Wiels. Esaki a bai kontra di deklarashonnan ku e akusado a hasi anteriormente, kaminda e akusado a atmití di a asesiná Sr. Wiels. Segun e akusado e la hasi e deklarashonnan ei bou di preshon i bou di promesa di Ministerio Públiko. Segun e akusado, Ministerio Públiko a promete ménos kastigu pa su kooperashon den e kaso i tambe a promete su kasa sèn i nan mudansa pa Hulanda.
Tabata un tiki difísil pa e Hues kaba di komprendé kon Kuwas a duna un deklarashon ku ta inkrimin’e siendo ku segun Kuwas e no a forma parti di e asesinato si Sr. Wiels.
Kontrali na deklarashonnan hasi pa testigunan den kontra di Kuwas, Ministerio Publiko no a trese pruebanan palpabel ku ta involukrá Kuwas den e asesinato di Sr. Wiels.
Mañan ta sigui ku e tratamentu di e kaso di Elvis ‘Monster’ Kuwas. Ta di spera ku mañan Ministerio Públiko lo trese algun prueba mas konkreto kontra Kuwas, paso loke a keda trese ayera i ku tin awor aki riba mesa ta un poko suak. Ministerio Públiko mester kuminsá hasi mas uso di prueba palpabel i kuminsá duna ménos importansia na pruebanan testimonial tradishonal kual ta tap telefòn i deklarashonnan di testigu. E tipo di pruebanan aki ta útil, pero lo sirbi mihó si bo por supstansiá nan ku pruebanan palpabel.