WILLEMSTAD – Riba enkargo di nos Promé Minister, Sr. Ivar Asjes, na yüni awor Reda Sosial lo kuminsá drecha diferente fèlt i/òf fasilidat deportivo den barionan di Kòrsou. Den kuadro di su meta pa stimulá desaroyo sosial-ekonómiko, Reda Sosial, a inventarisá tur e trabounan ku mester keda realisá pa hasi e fasilidatnan, ku poko poko a bin ta deteriorá, atrobe funshonal pa hasi deporte.
Segun Promé Minister Asjes, e fasilidatnan deportivo ku Reda Sosial lo bai renobá ta e fèlt di bala na Kaya Paul de Lima, Brievengat, kaminda lo laga limpia i egalisá dos diferente tereno di 8.100 m² i 2.500 m² ku ta destiná pa praktiká futbòl i mini-futbòl. Lo pone un waya haltu pa protehá e kasnan den serkania, drecha e sistema di iluminashon ku ta den mal estado i sera e terenonan di tal forma ku no por subi kore outo ni basha shushi mas riba nan.
Na Ser’i Fortuna lo laga drecha prinsipalmente e tereno di basketbòl ku ta den hopi mal estado i na Koraal Specht lo renobá e tereno di futbòl ku ta situá entre Kaya Poron i Kaya Pilon i instalá un sistema di iluminashon. Bario di Steenmijn, ku nunka promé tabata tin un fasilidat pa hasi deporte awor lo haña un fèlt pa uso multi-funshonal kaminda hóbennan di bario por praktiká speshalmente mini-futbòl i basketbòl. Den e area di Bok’e Samí tambe Gobièrnu lo laga traha un fasilidat deportivo multi-funshonal nobo ku su kamerinnan, un tribuna i un fèlt pa basketbòl i mini-futbòl ku su sistema di iluminashon.
Otro area di Kòrsou ku tambe lo haña un fèlt deportivo multi-funshonal nobo ta Otrobanda, kaminda tur habitantenan di Otrobanda i bisendario por praktiká e deportenan popular manera vòlibòl, basketbòl i mini-futbòl. Na Ser’i Kandela lo drecha e fèlt di bala i na Tera Korá lo renobá e fasilidat di beisbòl kompletamente p’asina hóbennan di e areanan aki tambe por praktiká i partisipá den kompetensha ofisial. Ademas, manera Promé Minister Asjes a primintí, lo reanudá e trabounan pa finalisá e promé fase di e kompleho deportivo multi-funshonal na Barber den luna di yüni awor pa despues sigui ku di dos fase di e proyekto importante aki pa habitantenan di Banda Bou.
Segun Promé Minister Asjes, e invershon èkstra pa drecha nos fasilidatnan deportivo den bario ta sumamente nesesario i primordial pa stimulá un desaroyo deportivo sano i positivo pa no solamente nos hubentut, pero pa henter Pueblo di Kòrsou. “Di e forma aki nos Gobièrnu ke duna tambe kontenido real na e vishon di edifikashon, formashon i konstrukshon di nos Nashon. Ora e fasilidatnan deportivo aki keda renobá, nos hóbennan por dediká nan tempu liber di un forma positivo i sano pero alabes desaroyá nan habilidat- i talentonan individual. Hasi Deporte ta Forma Patria”, asina Promé Minister Asjes a indiká.