WILLEMSTAD – Promé Minister, Sr. Ivar Asjes a risibí e Selekshon di Natashon di Kòrsou ku tabata asina eksitoso na e kompetensia di CARIFTA Championship 2014, na Aruba. Durante e enkuentro ameno na Forti, e selekshon di e hóbennan atleta, algun mayor i direktiva di Federashon Aquatiko Kòrsou a haña un felisitashon personal di parti di Promé Minister Asjes. Ta trata aki di un selekshon di 25 atleta di 4 diferente ekipo di natashon, ku a gana un total di 5 medaya di oro, 1 di plata, 3 di bròns i 48 puesto den final.
Promé Minister Asjes, a indiká na e hóbennan atleta ku Gobièrnu i pueblo di Kòrsou ta hopi orguyoso di nan presentashon i logronan. Tambe Promé Minister Asjes a gradisí e mayornan , coachnan i direktiva di e Federashon pa e gia ku nan a duna e hóbennan aki.