Gobièrnu a lanta e Instituto Nashonal di Deporte Kòrsou ofisialmente

WILLEMSTAD – Djárason último, nos Promé Minister, Sr. Ivar Asjes, na nòmber di Gobièrnu di Kòrsou a firma e akta di institushon huntu ku notario Simon na Fòrti pa asina lanta e Instituto Nashonal di Deporte Kòrsou ofisialmente.

Manera ta konosí, e intenshon pa realisá un Instituto Nashonal di Deporte pa Kòrsou a keda fórmula den e programa di Gobernashon 2013 – 2016, yamá: ‘Speransa i Konfiansa’ i tambe den e nota di maneho di deporte 2013 – 2017. Un di e metanan primordial di e instituto nobo aki ta pa mayoria di e fondonan bai pa e deportistanan via di e federashonnan i pa mantenshon di fasilidatnan deportivo. Pa logra esaki e instituto nobo lo bai funshoná mas efisiente, pa di e forma aki mas fondo bini liber pa por kumpli ku e metanan stipulá.

Tambe lo bai enfoká riba deporte komo instrumento pa desaroyá Kòrsou komo un nashon ku mas hende saludabel. Pa logra esaki lo bai stimulá mas hóben i adulto pa hasi diferente sorto di deporte i krea mas oportunidat pa nos grandinan i nos ko-siudadanonan spesial praktiká deporte. Un otro punto di enfoke ta pa duna atenshon, guia i respaldo pa logra mas tantu deportista tòp, profeshonal i promové mas kompetensia na nivel internashonal aki na Kòrsou ku lo habri kaminda pa mas turista deportivo bishitá Kòrsou.

Entretantu Gobièrnu di Kòrsou i Usona a duna e enkargo pa lanta e parti organisatorio di e Instituto Nashonal di Deporte na un tim profeshonal enkabesá dor di Sr. Gabi Da Costa Gomez, kual su kompania DCG Management NV a gana e destaho pa hasi e trabou aki. Alabes Sr. Gabi Da Costa Gomez lo fungi komo direktor interino di e instituto nobo aki pa e próksimo 6 lunanan. Konforme e planifikashon aktual, e intenshon ta pa e Instituto Nashonal di Deporte kuminsá funshoná ku supsidio di Gobièrnu pa 1 yanüari 2015.

Manera ta konosí, Gobièrnu di Kòrsou a disidí for di aña 2012 pa integrá Sedreko i FFDK den un Instituto Nashonal di Deporte. Despues ku e plan di maneho i di transishon keda aprobá tur trahadó di Sedreko i FFDK lo por solisitá i kontinuá nan karera sea den e Instituto Nashonal di Deporte òf na un di e federashon- i/òf asosashonnan di deporte, direktivanan di skol òf un otro instituto (semi) gubernamental. Durante di e proseso di transishon aki lo enbolbí ABVO, komo representante di trahadó debidamente.

Promé Minister Asjes ta hopi satisfecho ku e manera ku e proyekto pa realisá e Instituto Nashonal di Deporte pa Kòrsou a bin ta avansá. “E Instituto Nashonal di Deporte ta enserá un invershon supstansial èkstra den deporte i spesialmente e infrastruktura organisatorio relashoná ku deporte na Kòrsou. Tambe lo pone hopi énfasis riba formashon di lider i dirigentenan deportivo”, asina nos Promé Minister a indiká.