Nominadonan pa deportista di luna Mart 2014

WILLEMSTAD – Komishon deportista di luna a publiká su nominado pa e premio di deportista di luna mart2014.

E komishon a yega na e siguiente nominadonan:

1. Geryon Alberto (Futbòl), Geryon Alberto ta miembro di e ekipo SUBT. Geryon ta un hóben prometedor den e deporte di futbòl. Prueba di esaki ta e echo ku Geryon tabata klave den e viktorianan di su ekipo SUBT. Geryon den e promé enkuentro ku su ekipo SUBT, djasabra 22 di mart, a enfrentá e ekipo di Vesta, a anotá gol pa su ekipo SUBT bai ku e viktoria ku anotashon di 2-0. Geryon ta sigui destaká i tabata den e enkuentro di dia 29 di mart ku Geryon a sobresalí mas ainda ora ku e ta anotá no ménos ku 3 gol ‘Hattrick’, pa asina duna su ekipo un viktoria fásil di 5-1 riba e ekipo di SITHOC. Geryon den luna di mart, den 2 partido, a anotá 4 gol. E dos enkuentronan aki a tuma lugá den luna di mart pero Geryon aktualmente ta e lider goliadó ku 6 gol anotá den  3 enkuentro. Pa e motibu ariba menshoná Geryon Alberto a keda skohe komo nominado pa deportista di luna mart 2014.

2. Millard Petrona (BMX), Millard “M.J.” Petrona ta studia na Radulphus college i ta práktika e deporte di BMX. Tabata durante fin di siman di 21 pa 23 di mart, ku MJ a partisipá na e kompetensha ‘Gator Nationals’ na Tampa. E hoben M.J. Petrona tabatin un tremendo presentashon durante di e kompetensha aki. Dia 21 mart den pre race, Millard M.J. Petrona a sali number 1 den kategoria 14 aña ‘expert’. Dia 22 di mart M.J. Petrona a kore dos kategoria i a finalisá di 3 den ‘open class’ i den kategoria 14 aña ‘expert’ e la finalisá na di dos lugá. Millard M.J. Petrona a sera su wikènt na Tampa di un manera fenomenal logrando e di tres lugá den 14 aña ‘expert’ i a korona e obra ku promé lugá den e kategoria ‘open class’. Durante di e kompetensha MJ a logra un total di 5 trofeo. Na Kòrsou M.J. ta sigui destaká partisipando na e ‘Generation next 2014 BMX Battle’ ku a tuma lugá dia 29 di mart, kaminda e la konkista e puesto number 1 den e kategoria ‘open class 15+’ i promé lugá den kategoria ‘Boys 15’. Pa e motibunan ya menshoná, Millard “M.J.” Petrona a keda skohe komo nominado pa deportista di luna mart 2014.

3. Nargelis Statia (Atletismo), Nargelis ta un hoben di 16 aña ku ta studia na CDC i ta miembro di e ekipo Trupial. Nargelis ta un atleta di taya ku ta kosechando hopi eksito den atletismo. Nargelis den luna di mart a partisipá na e kompetensha di atletismo i a kibra rèkòrt nashonal  riba 100 meter i asina ta gana su 2 medayanan di oro riba 100 i 200 m. Nargelis a kibra e rèkòrt Nashonal  ku un tempu di 12,09 sekònde, Nargelis mes tabata esun ku anteriormente a kibra e rèkòrt aki for di aña pasá 2013 ku un tempu di  12,12 sekònde. E rèkòrt tabata for di 28 novèmber 1990 (12,14sekonde). Den Kareda di 200 meter tambe Nargelis a bai dilanti den tempu. Despues di a kore 25,08 sekònde, Nargelis a mehorá esaki na 25,02. Nargelis a logra su klasifikashon tambe pa ‘Carifta Games 2014’. Pa e motibunan ya menshoná, Nargelis Statia a keda skohe komo nominado pa deportista di luna mart 2014.

Komishon ta gradisí e siguiente spònsernan ku ta yuda pa e premiashon aki por bira posibel: CHANGES PRO SPORT – SALAS SPORT SHOP – RIO LOUNGE & SPORTS BAR- OLYMPIAT – MCB – PETRO INDUSTRIAL NV – CSOF – LILO SULBARAN – ALLSTAR EMBROIDERY – UTS – DIORCA NV – PELOTA – DE JONGH’S SPORTHUIS – FOTO STUDIO KORT  – STRAK STRAK BARBERSHOP- FFK

E anunsio i premiashon di e ganadó lo tuma lugá:

Fecha: Djasabra 12 Aprel 2014.
Ora: 18.00 – 19.00’or.
Sitio: Rio Lounge & Sports Bar, Chuchubiweg 10?Damacor.

Den un ambiente liber di humamentu i liber di alkohòl!