WILLEMSTAD – Djabièrnè dia 25 di aprel, un dia promé ku selebrá dia di Rei, lo tuma lugá e asina yama Koningsspelen (weganan di Rei) pa di dos aña konsekutivo. E weganan di Rei a tuma lugá pa promé biaha na aña 2013 den kuadro di selebrashon di Inougurashon di Rei Willem Alexander.
Despues di e gran éksito aki, kaminda mas ku 80% di tur skol di fundeshi den reino Hulandes a tuma parti, a disidí huntu ku Kas Real pa selebrá e weganan deportivo un biaha mas.
Nos Rei Willem Alexander ta un gran fanátiko di deporte. E gusta e deporte di schats, el a yega di kana máratòn na New York i a forma parti pa añanan largu di e komishon olímpiko internashonal. Rei Willem Alexander ta sigui apoyá e enkuentronan deportivo aki pa mucha pasobra e ta hopi importante pa nan desaroyo físiko i sosial.
E organisashon pa e parti Karibense di Reino ta den man un biaha di sra. Mavis Albertina. E aña aki Mavis a skohe pa traha riba tur isla ku diferente organisashon sosial i deportivo. Na Kòrsou tin ya kaba un palabrashon ku fundashon Sedreko i na Aruba ku fundashon IBISA. Na e otro islanan ta sa e siman aki kual organisashon ta dispuesto pa koperá. Meta di e weganan di Rei ta pa un biaha mas selebrá huntu e fiesta oraño di un forma deportivo i alegre.
E weganan di Rei ta tuma lugá e aña aki durante e siman di vakashon di Pasku di resurekshon. P’esei organisadónan a skohe pa organisá e aktividatnan deportivo di un forma sentral riba diferente vèlt i plenchi di skol pa tur mucha di skol di fundeshi ku kier partisipá. E dia deportivo ta kuminsá ku un desayuno salú pa tur mucha. E aña aki atrobe e desayuno di Rei ta ser patrosiná pa Jumbo supermarket na Hulanda.
Tur skol di fundeshi por inskribí e muchanan te ku djabièrnè awor 15 di mart. Tambe mester notifiká ken ta e persona di kontakto pa asina por kompartí tur informashon relevante. Pa mas informashon bishitá www.facebook.com/CaribischKoninkrijk òf www.koningsspelen.nl.