WILLEMSTAD – Djaweps, 17 òktober 2013, alrededor di 02.54’or di mainta sentral di polis a haña notifikashon ku un ladronisia ku violensia a kaba tuma lugá na Hill Ross kasino i ku e sospechoso nan a move for di e sitio ku un kantidat di sèn.
For di un investigashon ku polis a realisá na e sitio a resultá ku un ratu promé, kuater (4) persona, probablemente tur hende hòmber, tur bistí kompletamente na pretu ku kara tapá i ku arma di kandela tres (3) ku pistol/revòlver i unu (1) ku un arma outomátiko grandi a kore drenta den e kasino.
Dos di e sospechoso nan aki a keda para ku arma di kandela di mek riba e trahadó nan i e kliente nan di i ku tabata den e kasino. E otro dos sospechoso nan a pasa bai patras i kana bai rekto pa e kasita kaminda e kahera ta sinta. Un di e sospechoso nan a dal e glas di e kasita aki kibra ku un mukel i mesora a bula bai paden miéntras e otro sospechoso a saka un ‘handbag’ pone kla. E sospechoso parti paden di e kasita e ora ei a pasa un kantidat grandi di sèn pa esun ku e ‘handbag’. Despues di nan akto, e sospechoso nan a kore sali for di e kasino i a skucha tayer di outo ta skuer kore bai.
Kontinuando ku e investigashon, alrededor di algu pa 6’ordi mainta den Jasmijnweg na Mahaai, polis a bin haña i konfiská un outo koló maron ku probablemente e sospechoso nan a usa pa yega e kasino i despues hui bai for di e sitio.
Relato di sekuestro
Mas lat polis ta haña notifikashon ku a haña un dama di 29 aña di edat ku su man nan mará i su kara tapá, para den kaya na Jongbloed. E patruya polisial mesora a bai na e sitio i ei nan nan a bin topa ku e dama aki, ku entre tantu a haña yudansa serka algun siudadano.
For di un investigashon preliminar ku polis a realisá, a resultá ku alrededor di 02.00, e dama di 29 aña di edat a yega su kas ku ta keda den e área di pariba, kore drenta su kurá di kas i parker su outo. Na e momento ei tres(3) òf kuater(4) persona a sorprendé i a kita su yabi outo for di dje.
Despues e sospechoso nan aki a mara su man nan ku strep i a tapa su kara ku un paña. Ora nan a kaba, nan a hinka e dama aki den outo i a kore un ratu pa despues nan para e outo. E sospechoso nan a saka e dama for di outo, ainda ku su man nan di strep i su kara tapá i a pone para pafó. Seguidamente nan a bandoná e sitio den outo di e dama.
Nan a bisa e dama víktima ku un hende ta ei nan ta wak su moveshon nan i pa e keda ketu ketu. E víktima aki a keda para ei nan te mainta na momento ku a deskubri’é para ei nan i e la haña yudansa. A resultá ku probablemente ta e outo aki mes nan a usa pa kometé e ladronisia ku violensia na Hill Ross kasino na Groot Davelaar.