WILLEMSTAD – Informashon ku lo keda duná awe, ta e informashon ku por keda suministrá pa awor akí. Na momento ku por duna mas informashon lo hasi esaki, teniendo kuenta si, ku ta den sala di korte un kaso ta keda presentá i ta ei nan tur informashon den e kaso aki lo bira konosí.
Manera a keda trese dilanti na e rueda di prensa anterior, polis den e investigashon Magnus probablemente a logra resolvé tres otro kaso di asesinato. Awe nos por informá prensa ta kua e tres kaso nan aki tabata.
E promé kaso ta esun di desaparishon i asesinato di R. Martinez. Den e kaso ei tabatin 1 persona detené. R. Martinez ta un di esnan ku tabata keda sospecha di a kometé e asesinato riba defuntu sr. Helmin Wiels.
Kontinuando ku e investigashon den e kaso Magnus i den e 3 otro kaso nan ya menshoná, siman pasa djabièrnè outoridat nan a pasa over na detenshon di e persona di inisial nan E.R.K. nasé na Kòrsou di 36 aña di edat. E.R.K. ta keda sospecha di ta envolví den e kaso di asesinato di e víktima Concepcion ku a tuma lugá na luna di yanüari 2013 na Caracasbaai. Esaki ta e di dos kaso for di e tres nan ku nos a referí n’e biaha pasá.
Promé ku esaki E.R.K. tabata detené kaba, sospechá di ta envolví den e kaso di asesinato riba e víktima di fam Arnaud. Esaki ta un kaso ku a tuma lugá na luna di yüni 2012 na Sapaté. Dia 22 di mei 2013 E.R.K. a keda detené na aeropuerto na momento ku e la kaba di yega for di eksterior. Awe nos por konfirmá ku esaki ta e di tres kaso ku posiblemente a keda resolvé, miéntras tabata hasi e investigashon Magnus.
Awe den ora nan di mainta agente nan di Kuerpo Polisial di Kòrsou, agente nan di Recherche Samenwerkingsteam i agente nan di Douane di Kòrsou, bou guia di wes komisario i den presensia di miembro nan di Ministerio Públiko, a tene 5 entrada hudisial aki na Kòrsou. A tene entrada nan hudisial na Kaya Sakado, Cubaweg, Kaya Kitrin, Kaya Chikucha i Seru Loraweg. Na kaya Sakado outoridat nan a hasi un detenshon, Na Cubaweg tambe a detené 1 persona i na Kaya Chikucha a detené un di tres persona.
E persona nan ku a keda detené ta B.C.A.F. nasé na Kòrsou di 42 aña di edat, D.F.J.D. nasé na Kòrsou di 24 aña di edat, I J.D.C.B. nase na Hulanda di 28 aña di edat. Dos di e persona nan aki ta keda sospecha di ta direktamente envolví den e asesinato di sr. Wiels i e di tres lo ta esun ku direktamente tabata instruí e otro nan. Dos di e persona nan ku a keda detené awe ta keda sospecha tambe di asesinato òf envolvimentu den e asesinato di R. Martinez.
Na tur e sinku adrès nan ariba menshoná, a tene un búskeda (huiszoeking) i durante di e búskeda nan aki polis a haña i konfiská 3 arma di kandela, diferente telefòn, kòmpiuter i otro dokumento nan ku ta importante pa e investigashon.
E detenshon nan aki ta resultado di 4 luna intensivo di investigashon di parti di e team ‘Magnus’. Ku e tres detenshon nan aki outoridat nan a dal un paso grandi dilanti den e investigashon aki, sin embargo e investigashon no a kaba aki. E investigashon ta kontinuá pa asina yega tambe na esnan ku tabata e outor nan intelektual di e asesinato di sr. Helmin Wiels.
Esaki ta e informashon ku nos por suministrá na prensa i na komunidat pa awor aki. Na momentu ku por duna mas informashon, lo hasi esaki.