WILLEMSTAD – E konferensiá di prensa aki a wòrdu konvoká ku motibu di un moshon ku a wòrdu aseptá dor di Staten, kaminda Minister di Hustisia a wòrdu enkargá pa denter di dos biaha 24 ora proporshoná mas informashon tokante di e investigashon Magnus, siendo e investigashon di e asesinato di parlamentario Helmin Magno Wiels, un ke otro kos te asina leu ku esei no perhudiká e investigashon.
Ya por wòrdu indiká ku e informashon ku e outoridat nan hudisial por i lo duna na e momentu aki lo ta rasonablemente limitá. Un resúmen lo wòrdu duná di lokual a keda revelá kaba dor di hustisia i esei lo wòrdu suplementá ku algun informashon ku no a wòrdu publiká ainda. Tambe lo bin un splikashon tokante di e rason ku aktualmente nos no por duna mas informashon.
Pa hopi hende den komunidat no ta kla of ta hasta inkomprendibel di kon mas informashon, aparte di lokual tin na informashon kaba, no ta wòrdu kompartí ku e públiko. Awe, manera a wòrdu bisá kaba, lo purba en todo kaso di splika di kon na e momentu aki no ta posibel pa revelá mas tokante di e investigashon. Banda di esei lo husa e okashon pa respondé un par di pregunta ku a wòrdu plantia vários biaha dor di nos prensa lokal durante di e último dia nan aki.
E informashon ku lo wòrdu duná awe ta e úniko informashon ku na e momentu aki por i lo wòrdu kompartí ku públiko dor di e tim investigativo i Ministerio Públiko. Splikashon nan mas detayá tokante di e partisipashon nan ku lo sigui awor lo no por wòrdu duna.
For di e investigashon ku a kuminsá mesora despues di e fayesimentu di sr. Wiels, a sali na kla ku defuntu sr. Raul Martinez tabata envolví den e asesinato di defuntu señor Wiels. Martinez lo tabata e hürdó di e outo ku a wòrdu husá den e asesinato di defuntu Helmin Wiels. Pa ku su dimas parti i embolbimentu den e asesinato di sr. Wiels, niun otro partisipashon por wòrdu duná den interes di e investigashon pendiente.
Kontinuando ku e investigashon, sospecho nan di echo nan kastigabel a surgi kontra di defuntu Luigi Florentina. Sr. Florentina, despues di a haña e outorisashon di hues komisario, a wòrdu detené riba petishon di Ministerio Públiko Kòrsou na Hulanda, pone bou di kustodia i despues e la wòrdu trasladá pa Kòrsou. Te ku su fayesimentu riba 6 di sèptèmber último, defuntu Luigi Florentina tabata den su aresto preventivo a base di e sospecho di embolbimentu den e desaparishon i e asesinato di señor Raul Martinez. Te ku awor, e resúmen aki di lokual a wòrdu revelá durante di e rueda di prensa riba 19 di yüni 2013 tokante di e papel di e personanan aki.
Ku motibu di e fayesimentu di sr. Florentina, un rueda di prensa a wòrdu duná riba 7 di sèptèmber di 2013, kaminda un eksposishon di e suseso nan rondó di e fayesimentu di sr. Florentina, kual ta wòrdu lamentá dor di e tim di investigashon i Ministerio Públiko, a wòrdu duná dor di Minister di Hustisia, Kuerpo Polisial di Kòrsou i Ministerio Públiko.
Pa komplementá riba e lokual ku a wòrdu trese dilanti riba 7 di sèptèmber último tokante di e fayesimentu di señor Florentina, nos por komuniká na boso ku riba petishon di Minister di Hustisia un médiko forense ligá na NFI a bula bin Kòrsou for di Hulanda i ku djaluna último e la realisá e outopsia riba e kadaver di defuntu Florentina. E konklushon provisorio di e patólogo ta ku e morto di señor Florentina por wòrdu deklará dor di asfiksia, ku ta mèch un horkamentu. Entretantu e kurpa di sr. Florentina a wòrdu entregá na su famia.
Material di selula a wòrdu sigurá pa hasi investigashon toksikológiko na NFI na Hulanda. E resultado nan di e investigashon toksikológiko ta wòrdu sperá denter di ocho siman. Despues ku e resultado nan di e investigashon toksikológiko wòrdu risibí, e patólogo lo wòrdu skirbí pa ku e kousa di e fayesimentu di defuntu sr. Florentina.
Biniendo bèk riba e investigashon di e asesinato di sr. Helmis Wiels, esei ta kontinuando íntegramente.
Riba 3 di ougùstùs último, e sospechoso M.B. a wòrdu detené pa motibu di embolbimentu den e asesinato di Helmin Wiels. Mas lo wòrdu revelá tokante di e embolbimentu di M.B. den un fase mas avansá si ta asina ku e investigashon ta permití esaki. Dos siman pasá, riba petishon di Ministerio Públiko, e detenshon di M.B. a wòrdu prolongá ku 60 dia dor di hues komisario. M.B. ta enkarselá ainda.
Aunke ku no tin indikashon nan di komportamentu ku ta inkliná na suisidio serka M.B., medida nan di prekoushon èkstra a wòrdu tumá for di wikènt dor di e outoridat nan kompetente. Den kuadro di privasidat i siguridat personal di M.B., niun otro partisipashon no ta wòrdu hasí tokante di e medida nan tumá. Di e forma aki ta reakshoná mesora riba pregunta nan di prensa pa ku e protekshon i siguridat personal di e sospechoso M.B..
Eksternamente por parse manera no tin progreso òf ku e investigashon Magnus ta progresá masha poko. E imágen aki ta leu for di bèrdat. E tim investigativo aktualmente tin un mihó bista di e hende nan ku ta direktamente envolví den e asesinato di defuntu Helmin Wiels. Ademas, for di e rueda di prensa di 19 di yüni 2013, tin mas bista riba esnan ku posiblemente a duna e enkargo pa ku e likidashon di sr. Wiels.
Den e último konferenshanan di prensa nos tabata papia konsientemente di “indikashon nan tokante di e persona òf persona nan ku tabata envolví den e enkargo di e asesinato di Helmin Wiels”. E investigashon ta orientá su mes riba e intensifiká shon di e “indikashon nan” aki pa asina kompilá prueba kontra di e persona nan aki. Esaki ta un proseso poko poko i delikado, manera ku tur investigashon ku ta purba di haña sa ken ta e outor intelektual ta. E tim investigativo ta progresando den e proseso aki di kompilá prueba pa ku e outoran intelektual.
Importante ta pa indiká tambe, ku denter di e investigashon di e asesinato di sr. Helmin Wiels, entretantu e tim investigativo ku tur probabilidat a resolvé tres otro kaso di likidashon. Na e momentu nan aki lo no por duna detaye di kua kaso nan di likidashon ta papiando di dje, komo ainda e investigashon den e kaso nan aki ta kontinuá.
Tantu e tim investigativo, komo Ministerio Públiko ta tene famia nan yegá di defuntu Helmin Wiels debidamente informá tokante e progreso nan ku ta wòrdu hasí den e investigashon aki. Despues di e fayesimentu di sr. Florentina, tambe e miembro nan di famia a indiká ku e informashon ku a keda suministrá na nan te ku awor akí, ta duna nan e konfiansa ku e tim investigativo ta riba e bon kaminda pa logra resolvé e asesinato di sr. Helmin Wiels.
Komunidat mester ta konsiente di e echo ku buskamentu i hañamentu di informashon den e kaso aki, prinsipalmente hañamentu di deklarashon nan di testigu, no tur ora ta bai mes un lihé i fásil, komo hende nan hopi biaha tin miedu di duna un deklarashon. Ta pa e motibu ei e investigashon aki ya ta durando 4 luna i lo por dura un tempu mas, promé ku tur esnan envolví den e kaso aki keda identifiká, detené i hibá dilanti di korte.
Medio nan di komunikashon, i tambe algun parlamentario, a hasi e pregunta, di kon no a pone sèn disponibel pa esnan ku bini ku informashon ku por yuda den e kaso aki. E kontesta riba e pregunta aki ta konsistí di dos parti. Pa di promé: te ku awor no a mustra di ta nesesario pa a pone sèn disponibel pa haña informashon, ya ku ketu bai tin informashon nan relevante ta drentando den e kaso di asesinato di Sr. Helmin Wiels. E tim investigativo ta gradisí komunidat inmensamente pa esaki i ta pidi un i tur ku por tin informashon tokante di e kaso aki, pa sigui mèldu esaki via e number nan di telefòn ya konosí, esta 8666124 òf 911, i si un persona ke keda anónimo por yama e number di telefòn 108.
Un di dos motibu pa no a pone sèn disponibel pa haña informashon, ta ku eksperensia nan di den pasado a mustra, ku despues ku a pone sèn disponibel a drenta un avalancha di informashon di kual gran mayoria no por a wòrdu husá. Tur informashon ku drenta, mester wòrdu investigá i verifiká. Esaki ta tuma hopi tempu i tambe forsa laboral pa investigá tur e informashon nan ku drenta i awor akí tempu i hende por wòrdu husá di forma muchu mas efektivo.
Na kuminsamentu di e konferensiá di prensa aki a keda indiká kaba, ku outoridat nan hudisial lo duna algun informashon adishonal, pero ku lo no por duna muchu mas informashon ku e informashon ku a keda duná te na e momentu aki kaba. Tin diferente motibu pa ku esaki.
Si revelá informashon eksternamente muchu lihé tokante di un investigashon i hende nan sinti den ki direkshon e investigashon ta bayendo, nan lo por destruí wea nan (sporen), influensiá testigu nan òf sospechoso nan por trata di hui.
Un otro aspekto pa tene kuenta kuné ta seguridat di testigu nan i sospechoso nan. Si no atendé ku e informashon disponibel di forma hopi kouteloso i diskreto, esaki por trese bida di testigu nan i sospechoso nan na peliger. Den un investigashon, meskos tambe den e investigashon Magnus, kooperashon di testigu nan ta di suma importansia. I e kooperashon aki di testigu nan ta impliká ku mester protehá nan kontra otro nan ku lo ke hasi nan kualke daño. Ta pa e motibu aki e kaso aki i tur otro kaso ta wòrdu tratá ku e koutela nesesario.
Un di tres motibu pa no sali den publisidat ku muchu informashon, ta ku Ministerio Públiko ta kore e rísiko di wòrdu deklará no-aksesibel den kaso di un eventual persekushon, pasobra Ministerio Públiko por wòrdu tildá di ta hiba un „trail by media?. Tur persona ta ser konsiderá inosente, te na momentu ku un hues disidí lo kontrario. Dor di sali muchu lihé afó ku informashon, un sospechoso por keda „kondená? dor di sosiedat, promé ku el a sikiera presentá den sala di korte.
Nos ta komprendé e inkietut i e gana di mas informashon dor di prensa i komunidat den e kaso aki i tur otro investigashon ku ta andando na e momentu nan aki, pero un bia un alto inspektor a yega di ekspresá ku e mihó manera pa bo mata un investigashon, ta pa bo sòru pa durante di e investigashon saka mas tantu informashon posibel den publisidat. Hopi hende no tabata di akuerdo ku e ekspreshon nan aki, pero loke e inspektor a trese dilanti, ta un realidat.
Finalisando por wòrdu indiká, ku outoridat nan hudisial ta trahando di dia i anochi i ku tur medio na nan alkanse, pa mas lihé posibel trese esnan ku a kometé e asesinato di parlamentario defuntu Helmin Magno Wiels i tambe esnan ku a duna instrukshon pa e akto vil aki, dilanti di korte pa ei nan nan responsabilisá nan mes dilanti di un wes imparsial pa nan akto nan.