WILLEMSTAD – Ministerio Públiko Kòrsou (OM) konhuntamente ku Imigrashon di Kòrsou ta start entrante awe ku un proyekto ku ta bai hasi posibel pa detektá pa medio digital ku un pasahero ku ta bandoná òf drenta Kòrsou via di aeropuerto òf haf tin un but habri, sin paga.
Entrante awe ta posibel pa funshonario nan di Imigrashon tuma nota ora un persona tin un but habri. E sistema di but di OM a keda inkorporá den e sistema di “Border Management System”. Ministerio Públiko ta konsehá siudadano nan pa paga nan but promé ku biaha pa eksterior pa evitá posibel inkumbiniensia na Hato!
Pa mas informashon tokante kobransa i pago di but, bo por referí na e flyer “But di Tráfiko: Transakshon òf Kondena” ku ta disponibel na entre otro OM na De Tèmpel den Punda, na ofisina di Prokurador-General riba Wilhelminaplein, na Bentana di Informashon na Saliña, Ofisina di belasting na Emmastad i na bali di Imigrashon na Hato.