WILLEMSTAD – Ministerio Públiko Kòrsou ta kuminsá ku su kampaña di informashon “Paga bo but”. E públiko lo wòrdu informá kon di atendé ku un but di tráfiko mediante di un foyeto. E foyeto nan lo ta disponibel na vários lugá, entre otro na OM den De Tempel na Punda.
Tur siudadano por haña un but den tráfiko. Ta nos deber síviko sin embargo pa paga e but. Den e but, e oproepingsprocesverbaal (OPV), tin e splikashon di e infrakshon, i e infraktor ta wòrdu brindá e oportunidat di paga e suma di transakshon te ku un par di dia promé ku e fecha di e oudiensia pa asina evitá persekushon penal. Si akaso e infraktor no ta di akuerdo ku e but, e por defendé e OPV riba e fecha di oudiensia menshoná. Si e suma di transakshon no wòrdu pagá na ora, e kaso ta bin dilanti di hues. Si aun e echo wòrdu probá, e hues lo imponé un but. Esaki generalmente ta mas haltu ku e suma di transakshon.
Si e but no wòrdu pagá denter di e término stipulá, un amonestashon (aanmaning) lo sigui i e suma pa lei ta wòrdu oumentá. Si atrobe e pago no drenta despues di e amonestashon aki, un di dos amonestashon lo sigui i e suma pa lei lo wòrdu oumentá atrobe.
Si no paga e but despues di e di dos amonestashon na tempu, Ministerio Públiko por ehekutá e kastigu supsidiario pa e montante di but habrí. Pa kada 50 florin bo ta haña un dia di kastigu di prison.
Den e foyeto ademas tin tep tokante di posibel areglo nan di pago i e punto nan di pago pa e but nan di tráfiko i tambe informashon tokante di e dokumento nan ku un shofùr mester tin serka dje durante di un kontrol di tráfiko.
Ministerio Públiko ta bai start kontrol nan di tráfiko den kolaborashon ku polis i SKS. Un but ku mester wòrdu pagá ainda ku un amonestashon por wòrdu pagá mesora pa evitá enkarselashon.