Investigashon den kaso di asesinato di Sr. Helmin Wiels ta kontinuá

WILLEMSTAD – Polis a para awe, djaweps 16 di mei 2013, pa 17:40’or un vehíkulo riba Winston Churchillweg ku outoridat nan hudisial tabata buska en konekshon ku e asesinato di dia 5 di mei 2013. Polis a konfiská e vehíkulo aki pa mas investigashon. Alrededor di 18.30’or polis, den kompania di Fiskal di Ministerio Públiko, a hasi un entrada hudisial den un ofisina di un negoshi di hür outo na Rooi Santu. Na e sitio aki polis a haña i konfiská un vehíkulo mas i algun otro artíkulo ku ta di importansia pa e investigashon.

Djadumingu 12 di mei 2013 for di den ora nan di mèrdia te den ora nan lat di atardi polis a hasi un asina yama ‘Passantenonderzoek’ den e área kaminda e asesinato di Sr. Helmin Wiels a tuma lugá dia 5 di mei último.

Aki nan un par di minüt promé ku 5’or di atardi sentral di polis a risibí yamada ku tabata tin un tiramentu na e playa na Mari Pampoen, mihó konosí komo pier na Mari Pampoen. Na yegada e patruya nan polisial ku a bai na e sitio a konfirmá ku e lider e ala bès parlamentario pa partido Pueblo Soberano tabata gravemente herida. Mesora a kuminsá ku trabou nan di promé asistensia pero esaki no a duna resultado ya komo ku parlamentario Wiels a bin fayesé na e sitio.