“Passantenonderzoek” den kaso di asesinato pre meditá di Sr. Helmin Wiels

Djadumingu 12 di mei 2013 for di den ora nan di mèrdia te den ora nan lat di atardi polis a hasi un asina yama ‘Passantenonderzoek’ den e área kaminda e asesinato di Sr. Helmin Wiels a tuma lugá dia 5 di mei último.

Un ‘Passantenonderzoek’ ta un investigashon kaminda investigadó nan ta bai den un bario òf área determiná i ta plania adelantá kon ta komuniká i/òf laga pregunta nan atras ku ta di importansia pa e investigashon ku ta andando.

Riba e foyeto ku a laga atras tin e pregunta nan ei i tambe e number nan di telefòn ku por yama pa duna informashon. A skohe e área spesífiko i henter e bisindario pa hasi e investigashon (“Passantenonderzoek”) aki pa e siguiente motibu nan i meta nan:
• Pa por trata na alkansá tur persona ku ta pasa den e área ei frekuentemente sea na pia òf den kualke vehíkulo i ku e dia ei por a mira òf tende algu;
• Pa alkansá e persona nan ku tin kustumber di bai den e área ei riba e dia spesífiko;
• Pa alkansá e persona nan ku tabata i òf ta frekuentá e área ei den e ora ku e suseso a tuma lugá;
• Pa motibu ku tin un kantidat di hende ku ta frekuentá e sitio riba djadumingu i ku tabata presente e dia di e suseso;
• Pa krea espasio i pa por haña tur otro informashon ku tin di aber ku e kaso aki.

Siman pasa un par di minüt promé ku 5’or di atardi sentral di polis a risibí yamada ku tabata tin un tiramentu na e playa na Mari Pampoen, mihó konosí komo pier na Mari Pampoen. Na yegada e patruya nan polisial ku a bai na e sitio a konfirmá ku e lider e ala bès parlamentario pa partido Pueblo Soberano tabata gravemente herida. Mesora a kuminsá ku trabou nan di promé asistensia pero esaki no a duna resultado ya komo ku parlamentario Wiels a bin fayesé na e sitio.

Tep:
Polis ta súplika tur persona ku ta kere ku nan tin informashon riba e kaso di tiramentu aki, pa pasa e informashon pa polis. Kualke informashon ku bo tin ta bon bini. Por yama 8666-124 (number di informashon pa e kaso aki) òf tambe por yama na 911 durante di 24 ora òf e number anónimo 108 (108 bo anonimidat ta garantisá).