LISSE, Hulanda – Brian Mariano ta bek riba pista di atletismo ora ku riba djasabra 11 di mei e la partisipá na e di 31 edishon di e kareda Ter Specke Bokaal na Lisse. Esaki ta e promé kareda di e 17 temporada di Lotto Baancircuit. Mariano ku aña pasa a bira kampion Europeo ku e ekipo di relevo 4×100 meter a partisipá pa su ekipo Rotterdam Atletiek riba 150m i 4x100m relevo.
Den e evento di 150m, Brian Mariano a sali na di tres lugá den su seri ku un tempu di 15.96 sekònde. Na promé lugá a sali Giovanni Codrington ku un tempu di 15.61 sekònde i su tras tabata Jerrel Feller ku un tempu di 15.79 sekònde. Di e sinku seri nan di kareda 150m ta e tres koredó nan aki so a logra baha bo di 16 sekònde.
Pa loke ta trata e relevo 4x100m, Brian Mariano i su ekipo Rotterdam Atletiek a sali na promé lugá. E ekipo di Rotterdam Atletiek a logra un tempu di 40.28 sekònde. Ku kasi tres sekònde di diferensia a yega na di dos lugá e ekipo di Phanos Amsterdam ku tempu di 43.04 sekònde.
E di dos kareda di Lotto Baancircuit lo ta djasabra 18 di mei kaminda na Hoorn lo tin e Flynth Recordwedstijden. E di tres kareda ta Golden Spike, ku lo tuma lugá djadumingu 9 di yüni na Leiden. 7 di yüli e kompetensia ta bai sinta na Leiden den e Klaverblad Arena Games. E ultimo kareda di e temporada ta riba 7 di sèptèmber kaminda lo tin e Eef Kamerbeek Games na Eindhoven.