Detenshon relashoná ku asesinato pre meditá i menasa den kaso di parlamentario Helmin Wiels

WILLEMSTAD – No muchu ratu despues ku e parlamentario i ala bes lider di e partido Pueblo Soberano Helmin Wiels a keda asesiná, un video menasante a keda publiká riba internet. Riba e video aki bo por a mira un pantaya pretu ku un mensahe. E stem di e persona ku tabata trese e mensahe a wordu kambia i e ta bisa ku e promé pion a kai i ku mas lo sigi.

Alrededor di 12.55’or di mèrdia, dos hòmber a presentá na warda di polis Brievengat i a deklará ku nan a bini pa klarifiká un asuntu di un vidio riba Internèt. Ta trata aki di dos ruman, V.S.M., di 27 aña di edat i H.D.M., di 19 aña di edat, ámbos nasé na Kòrsou.

E dos sospechoso nan aki a keda detené na Warda di polis Brievengat pa asesinato pre meditá i menasa. A presentá e sospechoso nan dilanti di un Fiskal ousiliar ku a ordená pa enkarselá nan pa mas investigashon.

Kontinuando ku e investigashon polis a hasi entrada Hudisial na dos(2) adrès diferente, unu na Hydraweg i e otro na Comanchestraat. Na e adrès nan konserní polis a haña i konfiská diferente artíkulo ku ta di importansia pa e investigashon.

Parlamentario Wiels a keda asesiná djadumingu, 5 di mei 2013, alrededor di 16.55’or na altura di pir na Marí Pampoen. Aki nan un outo, probablemente un vehíkulo koló di oro a kore para i dos persona a baha for di e vehíkulo i lòs un kantidat di tiru riba sr. Wiels. E tiru nan aki a impakta e parlamentario na diferente parti di kurpa i tabata tin konsekuensia fatal.