Parlamentario Helmin Wiels asesiná na Kòrsou

WILLEMSTAD – Algu mas di seis luna despues ku e lider di partido Pueblo Soberano a bira e lider mas popular di Kòrsou e ta keda asesiná. Un par di minüt promé ku 5’or di atardi sentral di polis a risibí yamada ku tabata tin un tiramentu na e playa na Mari Pampoen, mihó konosí komo pier na Mari Pampoen. Na yegada e patruya nan polisial ku a bai na e sitio a konfirmá ku e lider e ala bès parlamentario pa partido Pueblo Soberano tabata gravemente herida. Mesora a kuminsá ku trabou nan di promé asistensia pero esaki no a duna resultado ya komo ku parlamentario Wiels a bin fayesé na e sitio. Helmin Wiels tabata tin 54 aña di edat i tabata biba serka banda di e sitio kaminda e la keda asesiná.